Շվեյցարիա-Հայաստան ընկերակցության նախկին նախագահ Սարգիս Շահինյանը կարծում է, որ Կազանում նախատեսվող հանդիպմանն այս պահին հստակ կարծիք, գնահատկան տալը ճիշտ չէ, քանի որ ոչ ոք ստույգ չգիտի, թե որոնք են այն հիմնական կետերը, որոնց վերաբերյալ երկու նախագահները կամ արտգործնախարարները կարող են համաձայնության գալ:
Ամեն դեպքում Սարգիս Շահինյանը նշում է՝ բոլոր նշանները կան՝ ենթադրելու, որ եթե նույնիսկ որևէ փաստաթուղթ չստորագրվի, որոշ հարցերի, խնդիրների վերաբերյալ գոնե բանավոր համաձայնություն կլինի:
«Եթե համաձայնության հասնեն, օրինակ՝ 8-10 հիմնական կետերից, խնդիրներից 4-ի շուրջ, մասնավորապես՝ ինքնորոշման, ազատագրված տարածքների մի մասից հայկական զորքերի հեռացման, Լաչինի միջանցքի և խաղաղապահ զորքերի տեղակայման վերաբերյալ, Թուրքիայի քաղաքականությունը արձանագրությունների վավերացման հարցով լրիվ կփոխվի, որովհետև Էրդողանի և Դավութօղլիի շահն է հասնել այդտեսակ մի լուծման, որպեսզի հայ-թուրքական արձանագրությունները, ինչպես որ կան, վավերացվեն»:
Մեր զրուցակցի գնահատմամբ՝ դա մեծ առավելություններ կտա Թուրքիային և մեծ դժվարություններ ոչ միայն Հայաստանին, այլ նաև ողջ հայ ազգին:
Եթե նման համաձայնություն լինի, Սարգիս Շահինյանի կարծիքով, լավ ազդանշան կլինի հենց Թուրքիայի համար, և դա ընկալելով տարածաշրջանային խաղաղությանն ու զարգացմանն ուղղված քայլ՝ նոր խորհրդարանը անմիջապես կվավերացնի հայ-թուրքական արձանագրությունները.
«48 ժամ էլ չի անցնի, որ Հայաստանի ԱԺ-ն կհետևի նրա օրինակին, կվավերացնի արձանագրությունները, ինչը մեզ համար կլինի ամենամեծ արհավիրքը»,- ասում է Սարգիս Շահինյանը:
Ավելին, նա հիշեցրեց, որ դեռևս 2009 թվականի հոկտեմբերի սկզբին, երբ Սերժ Սարգսյանը «փորձում էր արձանագրությունների շուրջ լեզու գտնել Եվրոպայի, Սփյուռքի հետ», իրենք համապատասխան փաստաթուղթ էին կազմել և հանձնել Սերժ Սարգսյանին՝ «բացատրելու, թե թակարդն ինչում է»:
«Սակայն տպավորություն ունեմ, որ նախագահը Սահմանադրական դատարանի որոշումների միջոցով ուզեց խնդիրները այդպես ծածկել, և եթե ՍԴ-ի 2010-ի հունվարի 10-ի որոշումները դե յուրե չընդգրկվեն այդ արձանագրությունների մեջ, ոչ մի նշանակություն չեն ունենա, և մենք կշարունակենք մնալ նույն թակարդի մեջ»:
