«Նոր Յառաջ» պարբերականը դեկտեմբերի 28-ին տեղեկացնում է, որ թուրքահայ հայտնի գրող և լեզվաբան Սևան Նշանյանը Թուրքիայի Վճռաբեկ դատարանի որոշմամբ դատապարտվել է երկու տարվա ազատազրկման` Իզմիրի իր հողամասում ապօրինի շինարարություն իրականացնելու մեղադրանքով:
Պոլսում հրատարակվող «Ակոս» պարբերականը տեղեկացրել է, որ Նշանյանը դեկտեմբերի 23-ին հանձնվել է դատախազությանը և այդ մասին Twitter-ի իր էջում գրել է. «Այսօր հանձնվեցի դատախազությանը: Հունվարի 2-ին բանտ պիտի գնամ: Կարծում եմ, որ առնվազն երկու տարի պիտի անցկացնեմ այնտեղ, սակայն հաստատ ոչ ոք չգիտի»:
«Նոր Յառաջ»-ը հիշեցնում է, որ 2011-ի մարտի 9-ին Ս. Նշանյանը երեք տարի չորս ամսվա ազատազրկման էր դատապարտվել «ապօրինի շինարարության» համար: Ըստ թերթի՝ դատարանն իր որոշումը կայացրել էր՝ ելնելով նրանից, որ լրագրողն ունի անշարժ գույք, որը Թուրքիայում անվանում են «Նշանյանի տներ», իսկ Իզմիրի իշխանությունները փափագում են դրանք քանդել իբրև ապօրինի շինություն:
Նշանյանն ինքը կատարվածը համարում է իր դեմ ուղղված գործողություն: Նա հայտարարել է, որ թուրքական իշխանությունները կարող են կյանքի կոչել իրենց որոշումը միայն այն դեպքում, եթե սպանեն իրեն: Խնդրո առարկա կառույցները փոխանցվել են «Ազիզ Նեսին» բարեգործական հիմնադրամին:
Թերթը նշում է, որ երբ Նշանյանն ասում է, թե կատարվածն իր անձի դեմ է, չի սխալվում: Նրա կրքոտ ու հանդուգն ելույթները՝ «թրքության, մահմեդականության մասին, միշտ էլ գրավել են ազգայնամոլ կամ կրոնամոլ շրջանակների ուշադրությունը»:
Պարբերականը հեգնանքով նշում է՝ քանի որ «ժողովրդավարական արժեքներին դավանող» Թուրքիայում խոսքի ազատության հանդեպ «հարգանք» կա, նախընտրելի է ապօրինի շինարարության և նման այլ պատճառաբանություններով փակել մարդկանց բերանները: