«Խնդիրն այն է, որ մենք այդ սկզբունքները հասկանում ենք մի կերպ, ադրբեջանցիներն` այլ կերպ: Ադրբեջանցիները վերջին տարիներին բոլոր պաշտոնյաների, ընդհուպ մինչև նախագահի բերանով հայտարարում են, որ պատրաստ են ռազմական եղանակով հասնելու խնդրի կարգավորմանը: Դա առաջին սկզբունքի խախտում է»,- պատասխանելով ԼՂ հարցի կարգավորման վերաբերյալ ԵԽԽՎ պատգամավորների հարցերին՝ նշեց ՀՀ նախագահ Սերժ Սարգսյանը:
Նա ընդգծեց, որ դեռևս 2007 թ. հայկական կողմը հայտարարել է, որ մադրիդյան սկզբունքների հիմքում դրված սկզբունքները արդար կարգավորման հնարավորություն են տալիս: Նա նաև նկատեց, որ Հայաստանն ընդունում է տարածքային ամբողջականության սկզբունքը և դեռևս որևէ տարածքային պահանջ չի ներկայացրել ոչ Ադրբեջանին, ոչ որևէ այլ երկրի, և հենց այդ պատճառով էլ Հայաստանը դեռ չի ճանաչել Լեռնային Ղարաբաղի անկախությունը:
«Ազգերի ինքնորոշման սկզբունքը մեզ համար հասկանալի է, ընդունելի է, դա հնարավորություն տվեց վերջին տարիներին մի քանի տասնյակ պետություններ ստեղծել: Սակայն ադրբեջանցիներն այլ կերպ են մտածում. նրանք ասում են, թե ընդունում են այդ սկզբունքները, այդ թվում՝ ազգերի ինքնորոշման սկզբունքը, բայց՝ կոնկրետ դեպքում իրենց սահմաններում: Մենք ասում ենք, որ դա խուզած ինքնորոշում է:
Ինքնորոշումը պետք է լինի այնպիսին, որ հնարավորություն տա ինքնուրույն լուծել իր ճակատագիրը: Մադրիդյանը սկզբունքների էությունն այն է, որ չեն կարող չընդունվել: Մենք որևէ վերապահում չունենք»,- խոսելով երրորդ հիմնարար սկզբունքի մասին՝ նկատեց Սերժ Սարգսյանը:
ՀՀ նախագահը նաև պատասխանեց ԵԽԽՎ ԼՂ հարցով ենթահանձնաժողովի աշխատանքներին Հայաստանի պատվիրակության չմասնակցելու մասին հարցին և նշեց, որ ենթահանձնաժողովը չի կարող աշխատել առանց հայկական կողմի մասնակցության:
«Ենթահանձնաժողովը պատմական որևէ հիշողություն չունի, չի տիրապետում բանակցային գործընթացի մանրամասներին, վերջինիս մանդատի մեջ չի մտնում հարցի կարգավորումը, դա վստահվել է ԵԱՀԿ-ի ՄԽ-ին, և ավելի վստահելի, առավել կոմպետենտ կառույց այս հարցում ես չեմ տեսնում: Կարծում եմ, որ ենթահանձնաժողովի աշխատանքները արդյունավետ չեն լինի, և ես լիովին պաշտպանում եմ մեր պատվիրակության կարծիքը»: