«Նոր Յառաջ» պարբերականը, հղում կատարելով թուրքական «Թարաֆ» օրաթերթին, տեղեկացնում է, որ Հրանտ Դինքի սպանության մեջ կասկածվող Էրհան Թունճելը ոստիկանության հետախուզության վարչության պետ Էնկին Դինչին «սպառնալիքներով լեցուն» նամակ է ուղարկել:
Թունճելն իր հին վկայություններում պնդել էր, որ սպանության պատասխանատուն Տրապիզոնի ոստիկանության պետ Ռամազան Աքեիվրեքի գլխավորած հանցախումբն է:
Նամակում Թունճելը գրում է, որ եթէ դատական հաջորդ նիստում իրեն ազատ չարձակեն և բարոյական ու նյութական փոխհատուցում չտրամադրեն, ինքը կհայտարարի, որ սպանությունն իրականացվել է «Էրկենեքոն» խմբավորումից էլ բարձր կառույցի կողմից:
Նամակում նշվում է. «Գոնե մեկ անգամ կատարիր մեծ եղբոր պարտականությունը, և ես, ինչպես միշտ, կկատարեմ կրտսեր եղբոր պարտականությունը: Հակառակ պարագայում բոլոր հարցաքննություններում պետք է նշեմ, որ Դինքի սպանությունը ծրագրված է «Էրկենեքոն»-ից բարձր խմբավորման կողմից»:
«Թարաֆ»-ի հոդվածագիր Էմրե Ուսլուն նշում է, որ Էրհան Թունճելը Էնկին Դինչին գրած նամակում մի շարք հարցերի վրա լույս է սփռում: Թունճելը բացահայտորեն պաշտոնյային սպառնում է՝ նշելով, որ նա եղել է իրեն օգտագործողներից մեկը:
Հիշեցնենք, որ Հրանտ Դինքը սպանվել է 2007-ի հունվարի 19-ին:
