Այս պահին ՀՀ նախագահ Սերժ Սարգսյանը Եվրախորհրդի Խորհրդարանական վեհաժողովում պատասխանում է պատգամավորների հարցերին: ԵԽԽՎ-ում հայաստանյան պատվիրակության անդամ Զարուհի Փոստանջյանը, դիմելով Սերժ Սարգսյանին, նկատեց, որ 1995 թվականից Հայաստանում անցկացվող ընտրությունները կեղծվում են, և այժմ Հայաստանում ձևավորվել է ավտորիտար ռեժիմ: Փոստանջյանը Սարգսյանին հարցրեց՝ արդյո՞ք վերջինս չի պատրաստվում ինքը նախաձեռնել փոփոխություններ, ընտրական գործընթացների բարեփոխում և հեռանալ` նախաձեռնելով արդար արտահերթ ընտրություններ:
«Ես հարգում եմ ձեր կարծիքը, բայց համամիտ չեմ դրա հետ»,- պատասխանեց Սերժ Սարգսյանը:
Նա նշեց, որ միջազգային կառույցներից հնչող կարծիքները, ինչպես նաև մի շարք այլ կարծիքներ չեն համընկնում Փոստանջյանի կարծիքի հետ, ինչի համար ինքն ուրախ է: Սարգսյանի խոսքերով, Հայաստանի իշխանությունները լսում են երկրի ընդդիմությանն ու իրենց գործընկերներին. «Հայաստանում ընթանում են կարևոր և համապարփակ բարեփոխումներ, բազմիցս կոչ ենք արել բոլորին մասնակցել այդ բարեփոխումներին` իրենց կոնկրետ և կառուցողական առաջարկություններով»:
Անդրադառնալով Զարուհի Փոստանջյանի կոչին՝ հեռանալ արդար և արտահերթ ընտրությունների միջոցով, Սերժ Սարգսյանը նշեց. «Ես չեմ պատրաստվում Հայաստանում արտահերթ ընտրություններ անցկացնել, որովհետև դրա անհրաժեշտությունը չկա, և մեր Սահմանադրությունն էլ թույլ չի տալիս այդպես հեշտ իրականացնել արտահերթ ընտրություններ»:
Սարգսյանը կոչ արեց Փոստանջյանին ակտիվորեն մասնակցել հերթական ընտրություններին: Նա նշեց, թե համաձայն է այն գնահատականին, որ Հայաստանում անվստահության մթնոլորտ կա հատկապես ընտրությունների նկատմամբ, և անհրաժեշտ է այնպես անել, որ առաջին հերթին հենց հանրությունը ընդունի այդ ընտրությունները:
