Այսօր լրագրողների հետ հանդիպման ժամանակ ՀՀ նախկին վարչապետ Հրանտ Բագրատյանը հայտարարեց, որ իշխանություն-ՀԱԿ երկխոսության այս գործընթացը ԼՂ հարցի բանակցություններում Սերժ Սարգսյանի դիրքերը ուժեղացնում է, քանի որ վերջինս այժմ ավելի դեմոկրատ է ընկալվում և առաջին անգամ է, որ կարող է «ոչ» ասել հակամարտության կարգավորման անընդունելի տարբերակներին։
«Սերժ Սարգսյանը Կազան է գնում որպես դեմոկրատ նախագահ՝ ի տարբերություն Ալիևի։ Սերժ Սարգսյանը 2 անգամ, 3 անգամ բարձր կարող է խոսել Կազանում։ ՀԱԿ-ը սա տվեց Ս.Սարգսյանին՝ իր վարկանիշի հաշվին»,- ասաց Հ.Բագրատյանը՝ հավելելով, թե սա չի նշանակում, թե Ս. Սարգսյանը պատասխանատու չէ մարտի մեկի կամ երկրում ստեղծված ծանր իրավիճակի համար։ «Ինչու մենք երեխա՞ ենք, չենք հասկանու՞մ, որ Մարտի 1-ի համար Ս. Սարգսյանն էլ է պատասխան տալիս։ Չենք հասկանու՞մ այս թալանը ոնց է տեղի ունեցել։ ՀԱԿ-ը մեծ քայլ արեց իր հեղինակության հաշվին։ Ես վստահ եմ, որ ՀԱԿ-ը կհաղթի, բայց մենք այսօր շատ մարդիկ ունենք, որ ասում են՝ սա մեզ համար անընդունելի է։
Ես ողջունում եմ երկխոսությունը, ՀԱԿ-ը ճիշտ է արել, բայց ես փորձում եմ ՀԱԿ-ի ներսում պահել այս դիրքը։ Վերջին հաշվով քաղբանտարկյալներ ազատելը պարտավոր էին անել, ինչու՞ էին դատել որ։ Վերջին հաշվով վերականգնվել է արդարությունը, չի արվել ավելացված արդարություն։ Այսինքն՝ սրա հետ կապված մեր բերանից «լոզերը չպիտի գնան»։ Եվ հեղափոխության, կտրուկ փոփոխությունների պատրաստակամության մահակը իշխանությունն ու Ս.Սարգսյանը ամեն օր պետք է տեսնեն»,- ասաց Հ.Բագրատյանը։
Նրա խոսքով՝ Ս.Սարգսյանն այևս չունի այնպիսի «մականուններ», ինչպիսիք ուներ Սոչիի կամ դրանից առաջ եղած հանդիպումների ժամանակ։ «Այսօր նա ընդդիմության կողմից չունի մարդասպանի մականուն։ Եվ այսօր ինքը երկխոսության մեջ է իր ընդդիմության հետ։ Եթե Ս.Սարգսյանը մինչև այդ կարող էր իր ձայնը մինչև 10 դեցիբել բարձրացնել, հիմա արդեն կարող է 20 դեցիբել բարձրացնել։ Ու եթե Կազանում մի փաստաթուղթ տան, որը անընդունելի է, առաջին անգամ է, որ Ս.Սարգսյանը կարող է ասել՝ մեր ժողովրդի համար սա անընդունելի է։ Սա հիմա նա կարող ասել։ Եթե առանց այս երկխոսության ասեր՝ մեր ժողովրդի համար անընդունելի է, կասեին քո ժողովուրդը 200 հազարով կանգնած է մատենադարանի մոտ կամ Ազատության հրապարակում»,- հայտարարեց Հ.Բագրատյանը։