«Որևէ դրական առաջընթաց չեմ տեսնում, 1997-ի հետ համեմատած սա հետընթաց գործողություն է»,-անդրադառնալով Կազանում կայանալիք հանդիպմանը՝ այսօր լրագրողներին ասաց ՀՀՇ վարչության անդամ Երջանիկ Աբգարյանը։ Նա նաև նշեց, որ եթե նկատի ունենանք կարգավորման առաջացման հիմքերը, ապա մութ հարցեր շատ կան դրանցում։
ՀՀԿ ԱԺ պատգամավոր Արտակ Դավթյանը, խոսելով նույն խնդրից, նշեց, որ կազանյան հանդիպումից սպասվող արդյունքները կախված են Ադրբեջանի նախագահի դիրքորոշումից, նայած, թե վերջինս որքանով կառուցողական կլինի և հավելեց. «Սկզբունքները կողմերի դիրքորոշումներն են արտահայտելու ընդամենը, և այս ամենը պիտի խարսխված լինի ուժի չկիրառման վրա, որի մասին տեսակետները միանշանակ են։ Ինչևէ, մեզ 3 օր է մնացել և անկախ արդյունքներից՝ ցանկացած հանդիպում արդեն առաջընթաց է, դրանց շնորհիվ է, որ խաղաղությունը պահպանվում է։ Ինչպես հայտնի խոսքում է՝ ցանկացած փխրուն խաղաղություն ավելի լավ է, քան ամենափոքր պատերազմը»։ Ա. Դավթյանը նաև նկատեց, որ այս հանդիպումը Ադրբեջանին խորհելու տեղ կտա և սկիզբը կնշանավորի այն քայլերի, որոնք իրականում պետք է միտված լինեն ադրբեջանի ժողովրդի աչքերը բացելուն։
Խոսելով ներքին երկխոսության և վերջինիս հնարավոր աղերսների մասին՝ կապված կազանյան հանդիպումների հետ, Երջանիկ Աբգարյանն ասաց. «Եթե այդպիսի երկխոսություն սկսվի, այն բնականաբար կուժեղացնի իշխանության դիրքերն արտաքին հարաբերություններում, իսկ թե ինչ միտում ունեն ներքին զարգացումները, ես լավատես չեմ, մանավանդ Սերժ Սարգսյանի վերջին ելույթից հետո»։
Իսկ Արտակ Դավթյանն այս մասին ասաց, որ երկխոսությունը վաղուց է սկսվել և հույս հայտնեց, որ մենք ի վերջո կարմատավորենք քաղաքական նորմալ մշակույթ։
