Հայ փոխադրողներն ահազանգում են, որ Իրանի տարածքով լաստանավային փոխադրումների դեպքում կոնտեյներների ծառայության գների թանկացում է տեղի ունեցել: Մեկ կոնտեյների հաշվարկով մոտ 1400 դոլարով թանկացել են բոլոր բեռնափոխադրումները:
«Կասեցում» նախաձեռնության համակարգող, գործարար Սամսոն Գրիգորյանի տեղեկացմամբ՝ թանկացման պատճառը ամերիկյան պատժամիջոցներն են ընդդեմ Իրանի։
«ԱՄՆ-ն տնտեսական նոր սանկցիաներ է կիրառել Իրանի դեմ, որի պատճառով լաստանավերը, որոնք գալիս են Բանդարաբաս նավահանգիստ և որտեղից այնուհետ գալիս են Հայաստան, այստեղ թանկացում է տեղի ունեցել՝ մեկ կոնտեյների հաշվարկով մոտ 1400 դոլար, բայց սա դեռ վերջնական թիվը չի, այսինքն առաջիկայում հնարավոր է, որ ավելի շատ թանկանա։
Սրան զուգահեռ Վրաստանի տարածքում գտնվող Փոթի նավահանգիստը՝ ինքնաբերաբար բարձրացրել է գինը՝ քանի որ չկա մրցակցություն, արդյունքում ստացվում է, որ մենք երկու կողմերից էլ ունենում ենք բարձր գներ»,- «Առաջին լրատվական»-ի հետ զրույցում նշեց Սամսոն Գրիգորյանը։
Վերջինիս խոսքերով՝ սա Հայաստանի համար պետք է ազդակ հանդիսանա, որ մենք դեռևս գտնվում ենք շրջափակման մեջ, այնպես, ինչպես 1990-ական թթ-ին էինք շրջափակման մեջ և «մեր գլխին թե գերտերությունները, թե հարևան պետություններն ինչ խաղ ուզում խաղում են»։
«Այս հարվածն իր վրա վերցնում է գործարարը, տնտեսվարողը, բայց միևնույնն է վերջնական հարվածը հասնում է սպառողին, քանի որ այդ թանկացման հետևանքով գործարարը ստիպված է լինելու թանկացնել իր ապրանքը, որի դիմաց վճարում է սպառողը, վճարում է քաղաքացին», -ընդգծեց Սամսոն Գրիգորյանը։
Նա հավելեց նաև, որ Բանդարաբաս նավահանգիստ են տեղափոխվում հիմնականում Չինաստանից ու Արաբական Միացյալ Էմիրություններից ներմուծվող բեռները և այդ ապրանքների գների թանկացում կլինի:
Թե ինչ չափով կլինի այդ թանկացումը՝ մեր զրուցակիցը դժվարացավ ներկա դրությամբ հստակ ասել՝ շեշտելով, որ դա կախված է նրանից, թե մեկ կոնտեյների մեջ ինչ քանակի ապրանք կլինի։
Մանրամասները՝ տեսանյութում։
