Քոչարյանի հարցազրույցը փորձ էր ազդելու քննության վրա… Պետք է Քոչարյանը ձերբակալվեր և այս հարցազրույցը տեղի չունենար: Քոչարյանը ձեռնոց նետեց իշխանությանը»,- անդրադառնալով ՀՀ երկրորդ նախագահ Ռոբերտ Քոչարյանի՝ ժամեր առաջ տեղի ունեցած հարցազրույցին՝ «Առաջին լրատվական»- ի հետ զրույցում այս մասին ասաց քաղաքագետ Հայկ Մարտիրոսյանը՝ հավելելով, որ սա պետք է դիտարկել, որպես սթափության կոչ իշխանությանը, որ դուրս գա հետհեղափոխական էյֆորիայից:
«Ռոբերտ Քոչարյանը վերադարձավ քաղաքականություն, անսպասելի էր: Կարծում եմ ինչպես վերադարձավ, այնպես էլ դուրս կգա քաղաքականությունից: Շատ դժնդակ մեսիջներ կային նրա ելույթում. փորձեց մեսիջներ հղել դրսի երկրներին՝ հրավիրելով Հայաստան, որպեսզի խաղադրույք անեն իր վրա»,- նշեց քաղաքագետը՝ հավելելով, որ իր կարծիքով՝ ոչ միայն պետությունները, այլ նաև դրսի քաղաքական ուժերը հետաքրքրված չեն լինի Քոչարյանի մեսիջներով:
«Քոչարյանն անդրադարձ կատարեց բանակին՝ փորձելով դեռևս այնտեղ մնացած իրեն հավատարիմ կադրերին՝ սպայական կազմին մեսիջներ հղել, որպեսզի հենվեն իր վրա, որովհետև հերթն իրենց է հասնելու՝ կոռուպցիայի համար դատվելու են և այլն: Սա շատ վտանգավոր և տհաճ քայլ է, որը կարժանանա պատասխանի, տեսնում ենք, որ բանակը մաքրվում է և բանակի ղեկավարությունը լուրջ քայլեր է կատարում:
Ակնարկեց, որ գնալու է Արցախ… Տեսնում ենք, որ Արցախը, ցավոք, վերածվում է հակահեղափոխական օջախի: Սա շատ մտահոգիչ հանգամանք է. Արցախը չպետք է ներքաշվի որևէ նման խնդրի մեջ:
Քոչարյանը դատական համակարգը տեսնում է որպես իր համար միակ արդարության աղբյուր, որովհետև գրեթե բոլորի վրա կոմպրոմատներ ունի: Եվ պատահական չէ, որ այս դատավորն այսպիսի որոշում կայացրեց, որը և իրավաբանական և քաղաքական առումով նոնսենս է:
ՀՅԴ-ն փաստացի լինելով Ազգային համաձայնության կառավարության մաս, ցավոք, այս պահին հակահեղափոխական ճամբարում է և Քոչարյանի հետ գնում է քաղաքական ինքնասպանության»,- նշեց Հ. Մարտիրոսյանը:
Մանրամասն՝ տեսանյութում:
