ՀՅԴ Բյուրոյի ներկայացուցիչ Հրանտ Մարգարյանը «Ազատություն» ռադիոկայանի հետ զրույցում անդրադառնալով Նիկոլ Փաշինյանի հայտարարությանը, թե իրենք ոչ մեկին ուժով չեն պահում կառավարությունում, ասել է, թե Փաշինյանը ճիշտ է ասում, բայց իրենք նրա հրավերով են գնացել կառավարություն: Հրանտ Մարգարյանը հայտարարում է, թե գնացել են օգնելու, «փրկելու նրան, Հայաստանը փրկելու»: Հետաքրքիր է, ումի՞ց են նրանք փրկելու Հայաստանն ու Նիկոլ Փաշինյանին, այն դեպքում, երբ հենց Դաշնակցությունն է ըստ էության «փրկվել» վերջին պահին՝ միանալով թավշյա հեղափոխությանն այն ժամանակ, երբ արդեն «ոզնուն էլ պարզ» էր, որ հեղափոխությունը հաղթել է: Իհարկե հայտնի է, որ եթե ՀՅԴ Բյուրոն հրամայի, ապա Դաշնակցությունը «կնստի նաև ոզնու վրա», բայց հրամանը կարծես թե ուշանում էր, և Դաշնակցությունը մինչև վերջին պահը նստած էր մնում ՀՀԿ-ի հետ իր կոալիցիոն տեղում, քանի դեռ այլևս պարզ էր, որ Սերժ Սարգսյանի և ՀՀԿ-ի իշխանություն գոյություն չունի:
Այլ կերպ ասած՝ Դաշնակցությունը ինքն է փրկվել, լծվելով Նիկոլ Փաշինյանի առաջնորդած հեղափոխության «կառքին»: Հիմա ՀՅԴ-ն հայտարարում է, թե կառավարությունում է Նիկոլ Փաշինյանին փրկելու, Հայաստանը փրկելու համար: Սա հայաստանյան քաղաքական մտքին, հատկապես իշխանական շրջանակներում հասունացած մտքին բնորոշ երեսպաշտությո՞ւն է, թե՞ պարզապես քողարկված սպառնալիք Նիկոլ Փաշինյանին ու Հայաստանին, որ ՀՅԴ-ին կառավարությունում, իշխանությունում չպահելու դեպքում կարող են լինել այնպիսի խնդիրներ, որից Փաշինյանը չի փրկվի:
Համենայնդեպս, Հրանտ Մարգարյանի հայտարարությունները խիստ տարօրինակ են հնչում Ռոբերտ Քոչարյանի ակտիվության և նաև նրա հետ գործակցության հնարավորության մասին հայտարարությունների ֆոնին:
Մյուս կողմից, անշուշտ, բավականին հստակ է, որ Դաշնակցության լիդերը պարզապես փորձում է մտնել «մեծ սակարկության» մեջ, խորհրդարանական ընտրություններից առաջ, որոնցում Դաշնակցության ճակատագիրը, իհարկե, բավական մշուշոտ է, և գերազանցապես այդ լիդերի և կուսակցության ղեկավարության վերջին տարիների քաղաքականության ու պահվածքի հետևանքով: Ըստ երևույթին, օգոստոսի 17-ի հանրահավաքին Նիկոլ Փաշինյանը կտա նաև Հրանտ Մարգարյանի պատասխանը, որը նաև դժգոհում է, թե չի կարողանում հանդիպել Փաշինյանի հետ և խոսել նրա հետ խնդիրների մասին, որովհետև ոչ թե մերժում են, այլ իշխանությունը անկազմակերպ է: Մարգարյանն ասում է, որ դրա պատճառով է խոսում հրապարակավ և արտահայտում մտահոգությունները: Թեև Հրանտ Մարգարյանը հրապարակավ ավելի շատ շանտաժով է զբաղված, քան առարկայական մտահոգություններ ներկայացնելով: