«Երևանի բնակչության 47 տոկոսը դրական է գնահատում ՀԱԿ-իշխանություն երկխոսությունը»,- այսօր լրագրողների հետ հանդիպման ժամանակ փաստեց հայկական սոցիոլոգիական ասոցիացիայի նախագահ, սոցիոլոգիական գիտությունների դոկտոր, պրոֆեսոր Գևորգ Պողոսյանը՝ մեկնաբանելով, որ բնակչությունը երկխոսության կայացումը լուծում է համարում ընդդիմադիր և իշխանական ուժերի միջև լարվածության թուլացման հարցում:
«Հասարակության տրամադրվածությունը գալիք ընտրությունների նկատմամբ ընտրություններից երեք ամիս առաջ ճշտելն անիմաստ է, քանի որ դա հետաքրքիր է միայն գիտնականներին, լրագրողներին: Իրադարձություններ կլինեն, որոնք լուրջ փոփոխություն կբերեն մարդկանց քաղաքական կողմնորոշման հարցում, կուսակցությունները դեռ պետք է իրենց կողմնորոշումներն արտահայտեն, որպեսզի ընտրողները կարողանան քվեարկել այս կամ այն կուսակցության օգտին»,- նշեց Գ. Պողոսյանը՝ հավելելով, որ ներկայացված արդյունքները շատ նախնական, ֆոնային են, որոնք դեռ կփոփոխվեն:
Ըստ սոցիոլոգի ներկայացրած հարցումների տվյալների՝ հասարակության 47 տոկոսը դրական է գնահատում երկխոսությունը, 20-ը՝ բացասական, իսկ մնացածը՝ չեզոք, հասարակության 37,6 տոկոսը կարծում է, որ իշխանության վարկանիշը կբարձրանա երկխոսության արդյունքում, 23,6-ը հակառակն է կարծում: Սոցիոլոգը ներկայացրեց նաև կուսակցությունների վարկանիշային ցուցակը, որոնց առաջին տեղերում իշխանական կուսակցութոյւններն են, երեկրորդ տեղում՝ ՀԱԿ-ը և ՀՅԴ-ն, իսկ երրորդ տեղում «Ժառանգություն» և «Օրինաց երկիր» կուսակցությունները:
Սոցիոլոգն ընդգծեց, որ սրանք միայն Երևանում վերջին ամսվա ընթացքում կատարված հետազոտությունների արդյունքներն են, որոնք մինչ ընտրութոյւնները դեռ շատ կփոփոխվեն: