Թուրքիայի մայրաքաղաք Անկարայում ընթացող Եվրոպայի առաջնությունում հայ բռնցքամարտիկներից միայն մեկին հաջողվեց դուրս գալ կիսաեզրափակիչ: Քառորդ եզրափակիչում Հրաչիկ Ջավախյանը 10:13 հաշվով զիջեց անգլիացի Թոմաս Սթալքերին, Արթուր Խաչատրյանը 9:11 հաշվով պարտվեց Վրաստանի ներկայացուցիչ Զոլտան Հարցային: Հաղթանակ տարավ միայն Վլադիմիր Սարուխանյանը, որը 23։10 հաշվով հեշտությամբ հաղթահարեց անգլիացի Մարտին Ուորդի արգելքը և կիսաեզրափակիչում կմրցի թուրք բռնցքամարտիկի հետ:
Այս մասին «Առաջին լրատվական»-ի հետ հեռախոսազրույցում հայտնեց Հայաստանի հավաքականի ավագ, բռնցքամարտի ֆեդերացիայի փոխնախագահ Արտակ Մալումյանը: Մալումյանը նշեց նաև, որ Անկարայում մրցավարները հայերի նկատմամբ լավ չեն տրադրված:
«Այստեղ՝ Թուրքիայում, հայ բռնցքամարտիկներին շատ դժվար են միավորներ տալիս: Թե՛ Ջավախյանը, թե՛ Խաչատրյանը գերազանցեցին իրենց մրցակիցներին, սակայն մրցավարները բացահայտորեն չէին հաշվում նրանց վաստակած միավորները: Իսկ Վլադիմիր Սարուխանյանն այնքան ուժեղ էր մրցակցից, որ մրցավարները հնարավորություն չունեին հաղթանակը նրան չշնորհելու»,- ասաց Արտակ Մալումյանը: