Ինչպես այսօր գրում է ռուսական Коммерсант թերթը, Մոսկվան առաջարկել է Մերձդնեստրի չճանաչված հանրապետության ղեկավար Իգոր Սմիռնովին հեռանալ պաշտոնից՝ ստանալով անվտանգության երաշխիքներ: Թերթը գրում է, որ Մոսկվան նրան կոչ է արել չմասնակցել առաջիկա նախագահական ընտրություններին: Այդ գործարքը պետք է տարածվի նաև Սմիռնովի ընտանիքի և բիզնեսի վրա:
Նշվում է, որ ռուսական կողմն արդեն մեկ անգամ չէ, որ ակնարկել է նման հնարավորության մասին:
Այդուհանդերձ, Իգոր Սմիռնովն ակտիվ նախընտրական քարոզչություն է իրականացնում: Մոսկվան աջակցում է մեկ այլ թեկնածուի՝ Անատոլի Կամինսկուն, որի օգտին մի քանի անգամ հանդես է եկել Ռուսասատնում իշխող «Եդինայա Ռոսիա» կուսակցությունը:
Հունիսի 21-ին վերջին 5 տարվա մեջ առաջին անգամ Մոսկվայում տեղի են ունեցել բանակցություններ, որն անցկացվել է 5+2 ֆորամտով, և որն ուղղված է Մերձդնեստրի հիմնախնդրի կարգավորմանը: Բանակցություններին, բացի Մոլդովայից և Մերձդնեստրից, մասնակցել են նաև ԵՄ-ն և ԱՄՆ-ն՝ որպես դիտորդ, ԵԱՀԿ-ն՝ որպես միջնորդ, ինչպես նաև Ուկրաինան և Ռուսաստանը՝ որպես գործընթացի երաշխավոր:
Ռուսաստանի կողմից նախապատրաստված կարգավորման սկզբունքների վերաբերյալ փաստաթուղթն այդպես էլ չի ստորագրվել Մերձդնեստրի կողմից ներկայացված առարկությունների պատճառով: Հիշեցնենք նաև, որ այս խնդիրն առաջացել է 1990-ականների սկզբին, երբ Մոլդովայի կազմի մեջ գտնվող Մերձդնեստրի շրջանը ինքնահռչակվել է անկախ հանրապետություն, որին հետևել են զինված գործողություններ: