Հայ-ադրբեջանական հակամարտությունը հայ-թուրքական հակամարտության շարունակությունն է: Իսկ երկխոսությունները արհեստական բնույթ ունեն: Այս մասին միջէթնիկ երկխոսությունները` որպես հոգեբանական պատերազմի տեսակ և դրա հետևանքները թեմայով ասուլիսի ժամանակ նշեց տեղեկատվության անվտանգության մասնագետ Վահրամ Միրաքյանը: «Արհեստական են այդ երկխոսության ձգտումները, որովհետև առաջինը քաղաքակրթական առումով մենք տարբերություն ունենք: Հատկապես արհեստական է, քանի որ Ադրբեջանում տարվում է նացիոնալիստական քարոզչություն, իսկ մեզ մոտ` խաղաղության: Ճգնաժամային, ճակատագրական պահին դա շատ բացասաբար կանդրադառնա մեզ վրա: Ադրբեջանը մեր թշնամին է: Ադրբեջանը ամեն օր սպանում է մեր զինվորներին` եղբայրներին` թե’ սփյուռքում, թե’ դպրոցականների մակարդակով: Ադրբեջանը այսօր ահաբեկչական պետություն է»,- նշեց Վահրամ Միրաքյանը: Իսկ տեղեկատվության անվտանգության մասնագետ Կարեն Վրթանեսյանն էլ ավելացրեց, թե չի կարծում, որ պատերազմի վտանգը այսօր` նոյեմբերի 18-ին, ավելի շատ է, քան 8 ամիս առաջ էր, քանի որ մենք այսօր պատերազմի մեջ ենք: «Պատերազմը ցանկացած պահի կարող է անցնել բաց փուլի: Պատերազմը չի ավարտվել. 94թ.-ից ի վեր մենք պատերազմական իրավիճակում ենք: Այս պայմաններում երկու կողմն էլ քարոզչական, հոգեբանական գործողություններ են իրականացնում, բայց քանի որ Հայաստանը ավելի բաց երկիր է, ինչքան էլ դժգոհ լինենք ինչ-որ երևույթներից, մենք ավելի խոցելի ենք դառնում քարոզչության, հոգեբանական ներազդեցությունների տարբեր ձևերի նկատմամբ»,- ավելացրեց Կարեն Վրթանեսյանը: