Երևանի պետական բժշկական համալսարանի մի խումբ ուսանողներ այսօր կրկին Կառավարության դիմաց բողոքի ակցիա էին իրականացնում և պահանջում էին վարչապետ Նիկոլ Փաշինյանի հետ հանդիպում։ Նրանց խնդիրը հետևյալն է՝ անվճար ընդունվել են, ստացել 6 տարի տարկետում, որպեսզի դառնան մասնագետ և զորակոչվեն բանակ՝ լեյտենանտի կոչումով։
Բայց, ինչպես Պաշտպանության նախարարությունից են փոխանցել, այս պահին համապատասխան հաստիքներ չունեն, որպեսզի նրանց լեյտենանտի կոչումով զորակոչեն բանակ։ Ուսանողներին առաջարկվել է մեկ տարի սովորել, որը ևս համարվելու է ծառայություն, որից հետո կզորակոչվեն բանակ և ևս 2 տարի կծառայեն։ Ուսանողների խոսքով՝ իրենք իրենց կյանքից մեկ տարի կորցնում են և միայն նրա համար, որ նախապես իրենց չի ասվել այս մասին, հակառակ դեպքում 18 տարեկանում կգնային բանակ և հիմա այս խնդրի առաջ չէին լինի։
«Առաջին լրատվական»-ի հետ զրույցում ուսանողները նշեցին, որ հանդիպում են ունեցել ԿԳ նախարարի հետ, ՊՆ փոխնախարարի, առողջապահության նախարարի հետ, սակայն հարցը դեռ մնում է օդում կախված, իսկ իրենց զորակոչը ձմռանն է։
Ապագա բժիշկները նաև հավելեցին, որ օրինական բոլոր ճանապարհներով պայքարելու են, որպեսզի օրենքի կիրառումը լինի, քանի որ, ըստ օրենքի, իրենք իրավունք ունեն և պետք է զորակոչվեն բանակ՝ որպես սպա, և կատարեն իրենց պարտականությունը։ Նրանք վստահեցրին՝ այստեղ բանակից խուսափելու, չծառայելու խնդիր չկա։
Մանրամասները՝ տեսանյութում: