Թուրքական Hürriyet թերթի փոխանցմամբ՝ 2003 թվականին պլանավորված Balyoz («Կռան») ռազմական հեղաշրջման գործի շրջանակներում ձերբակալվել է հերթական թուրք գեներալը։ Այս անգամ խոսքը գեներալ-լեյտենանտ Զիյա Գյուլերի մասին է։
Նրան ձերբակալել են Ստամբուլի 13-րդ ծանր հանցագործությունների դատարանի պահանջով։ Գյուլերը մեղադրվում է Balyoz-ի բաղկացուցիչ մասերից մեկը հանդիսացող «Օռաժ»-ի գործողություններում ներգրավվելու մեջ։
Սրանով Հասդալ բանտում գտնվող Balyoz-ի գործով ձերբակալված գեներալների թիվը հասավ 33-ի։
Հիշեցնենք, որ 2010 թվականի հունվարի 20-ին թուրքական Taraf թերթը հրապարակեց 2003 թվականին պլանավորված Balyoz ռազմական հեղաշրջման պլանի մանրամասների վերաբերյալ մի հոդված: Այդ պլանը հավանության էր արժանացել զինված ուժերի 162 սպաների, այդ թվում նաև՝ 29 գեներալների հանդիպման ժամանակ:
Balyoz-ի նպատակներին հասնելու համար մշակվել էին «Չարշաֆ», «Սաքալ», «Օռաժ» և «Սուգա» գործողությունները: «Չարշաֆ» գործողության պլանում առկա էր Ժանդարմերիայի կապիտան Հյուսեյին Թոփուզի, իսկ «Սաքալ» պլանում` Ժանդարմերիայի մայոր Հյուսեյին Օզչոբանի ստորագրությունը: Այս երկու գործողությունները նախատեսում էին հարձակումներ իրականացնել ստամբուլյան մզկիթների վրա: Ընդ որում՝ «Չարշաֆը» դա պլանավորել էր Ֆաթիհ մզկիթի, իսկ «Սաքալը»՝ Բեյազըթի դեմ:
Ինչ վերաբերում է «Օռաժ» գործողությանը, ապա դա ստորագրել է Իբրահիմ Ֆըրթընան: Դրա համաձայն՝ թուրքական կործանիչը պետք է ներխուժեր հունական օդային տարածք՝ դրանով իսկ օդային մարտ հրահրելով այդ երկրի ռազմաօդային ուժերի հետ:
Մարտի արդյունքում հունական ռազմաօդային ուժերը պետք է ցած գցեին թուրքական կործանիչը: Եթե չհաջողվեր նման կերպ Հունաստանին դրդել դիմելու ուժային քայլերի, ապա թուրքական վերստեղծված «հատուկ նշանակության նավատորմն» ինքը պետք է վայր գցեր սեփական կործանիչը և դրանում մեղադրեր Հունաստանին:
«Սուգա» պլանը ստորագրել է ռազմածովային ուժերի հրամանատար Օզդեն Օրնեքը: Սա նույնպես առնչվում էր Էգեյան ծովում ստեղծվելիք լարվածությանը:
