Ինչպես հայտնում է ИТАР-ТАСС-ը, Իրանը պատրաստ է «5+1» ձեւաչափով բանակցելու իր միջուկային ծրագրի վերաբերյալ: Այդ մասին այսօր Բաքվում կայացած մամլո ասուլիսում հայտարարել է Իրանի նախագահ Մահմուդ Ահմադինեժադը: «Մենք միշտ էլ երկխոսության կողմնակիցներ ենք եղել եւ բանակցելուն համաձայն ենք»,- ասել է Իրանի նախագահը: Նա հայտնել է, որ այժմ որոշվում է բանակցությունների անցկացման ամսաթիվը:
«Ինչ վերաբերում է բանակցությունների վայրին, ապա իրանական կողմն առաջարկում է Ստամբուլը, իսկ մյուս կողմը՝ Ժնեւը»,- նշել է Ահմադինեժադը: «Եթե նրանք ցանկանում են, որ բանակցությունները հաջողություն ունենան, ապա պետք է հրաժարվեն շահագործողի մտածողությունից: Իսկ եթե դիմեն հին մեթոդներին, ապա դրանից ոչինչ չի ստացվի»,- ընդգծել է Ահմադինեժադը: Նա նաեւ հայտարարել է, որ «պատժամիջոցներով Իրանին չեն վախեցնի»: «Իրանական ժողովուրդը գնում է իր ճանապարհով»,-ասել է Ահմադինեժադը:
Հիշեցնենք, որ ԱՄՆ պետքարտուղար Հիլարի Քլինթոնը, մեկնաբանելով հանդիպումը Թուրքիայում անցկացնելու Թեհրանի պատրաստակամությունը, հայտարարել էր, որ Իրանի հետ «վեցնյակի» հանդիպման վայրն ու ժամանակը կորոշի ԵՄ արտաքին գործերի եւ անվտանգության քաղաքականության հարցերով գերագույն ներկայացուցիչ Քեթրին Էշթոնը:
