News Georgia-ի փոխանցմամբ, ընդդիմադիր Լեյբորիստական կուսակցությունը կոչով դիմել է վրացի զինծառայողների հարազատներին ու մերձավորներին, որպեսզի նրանք արգելք հանդիսանան իրենց զավակներին Աֆղանստան ուղարկելուն, ուր վրացական ստորաբաժանումները գտնվում են Միջազգային անվտանգության աջակցության ուժերի (ISAF) կազմում։
Այս մասին հայտարարել է կուսակցության գաղափարական քարտուղար Կախա Ձագանիան.
«Վաղուց Վրաստանն ԱՄՆ-ի ու ՆԱՏՕ-ի համար վերածվել է «թնդանոթի մսի արտադրամասի»։ ՆԱՏՕ-ի անդամ շատ երկրներ իրենց զինծառայողներին չեն ուղարկում Աֆղանստան, մինչդեռ մեր երեխաների հետ նման կերպ վարվում է Սաակաշվիլին։ Դրանով նա ցանկանում է պահպանել իր իշխանությունը։
Մենք պահանջում ենք, որպեսզի ՆԱՏՕ-ն չօգտվի վրաց ժողովրդի անհաջողությունից և հրաժարվի իր օպերացիաներում վրացի զինծառայողներին ներգրավելուց»։
Հիշեցնենք, որ այսօր վրացական լրատվամիջոցները տեղեկատվություն տարածեցին, որ Աֆղանստանում մահացել է 9-րդ վրացի զինծառայողը։ Վրաստանն Աֆղանստանում ISAF-ի գործողություններում ներգրավվել է 2009 թվականից։ Ներկայումս այնտեղ են գտնվում 900-950 վրացի խաղաղապահներ։
2012 թվականին նրանց թիվը հասնելու է 1500-ի, որով և Վրաստանը պետք է դառնա ՆԱՏՕ-ի անդամ չհանդիսացող երկրներից Աֆղանստանում ամենամեծ զինվորական կոնտինգենտն ունեցող երկիրը։