Թուրքական Anadolu գործակալության փոխանցմամբ, թուրք պետնախարար, ԵՄ-ին Թուրքիայի լիիրավ անդամակցության գծով գլխավոր բանագնաց Էգեմեն Բաղըշը, Անկարայում հյուրընկալելով հայ, թուրք և ամերիկացի լրագրողներին, անդրադարձել է հայ-թուրքական հարաբերությունների կարգավորմանը։
Խոսելով Հայոց ցեղասպանությունից՝ Բաղըշն ընդգծել է, որ այն տարիներին տուժել է թե՛ հայ ժողովուրդը, թե՛ թուրք ժողովուրդը. «Պատմությունը հնարավոր չէ փոխել, այժմ Հայաստանն ու Թուրքիան համատեղ աշխատելու հնարավորություն ունեն՝ ապագայում մարդկանց, ժողովուրդների ու երկրների տանջանքները կանխելու համար։
Թուրքիայի ու Հայաստանի նախագահները համարձակ քայլեր են ձեռնարկել, որոնք անհրաժեշտ են եղել երկու երկրների միջև հարաբերությունների կարգավորման գործընթացը սկսելու համար։
Ադրբեջանի տարածքային ամբողջականության հարցը շատ զգայուն է Թուրքիայի համար, և Հայաստանի ու Ադրբեջանի միջև առկա խնդիրները չեն կարող անտեսվել։
Թուրքիան ոչ միայն ցանկանում է «զրո խնդիր» հարևանների հետ, այլև ցանկանում է, որպեսզի տարածաշրջանում իր հարևանները նույնպես խնդիրներ չունենան միմյանց հետ։ Մենք ցանկանում ենք Հայաստանի ու Ադրբեջանի միջև խնդիրների կայուն լուծում։ Եթե այդ լուծումը գտնվի, ապա դա մեծ հնարավորություններ կբացի տարածաշրջանի երկրների համար, ինչը կբխի բոլորի շահերից։
Հայ-թուրքական սահմանը կբացվի այն բանից մեկ օր անց, երբ Հայաստանն ու Ադրբեջանը ձեռք ձեռքի կտան»։