«Նախագահը պատրաստ է օրենքով սահմանված կարգով լուծարել Ազգային ժողովը»: Նման հայտարարությամբ այսօր հրավիրված ասուլիսի ընթացքում հանդես էր եկել ԱԺ ՀՀԿ-ական պատգամավոր Հակոբ Հակոբյանը՝ անդրադառնալով վերջին ներքաղաքական զարգացումներին` ՀԱԿ – իշխանություն երկխոսությանը:
ԱԺ ՀՀԿ խմբակցության ղեկավար Գալուստ Սահակյանին խնդրեցինք մեկնաբանել Հակոբ Հակոբյանի հայտարարությունը, ինչին ի պատասխան արձագանքեց. «Չի կարող նման բան լինել: Բայց, ամեն դեպքում, ես ասուլիսը կկարդամ կամ իրեն կտեսնեմ: Նման բան չի կարող քննարկվել, որ Հակոբ Հակոբյանն էլ նման հայտարարությամբ հանդես գա: Նման հարց հանրապետականում չի քննարկվել, և չէր էլ կարող նման հարց քննարկվել»:
Ավելի ուշ ԱԺ ՀՀԿ խմբակցության պատգամավոր Հակոբ Հակոբյանը հարցին, թե ընդդիմության պահանջը արդյոք կարող է նախագահը բավարարել, լուծարելով Ազգային ժողովը՝ պարզաբանել է.
«Ես բառացի կարդացել եմ Սահմանադրության 74.1-րդ հոդվածը, որ Հանրապետության նախագահը Ազգային ժողովի նախագահի ու վարչապետի առաջարկությամբ կարող է արձակել Ազգային ժողովը, եթե դրա համար լինեն օրենքով սահմանված կարգով հիմքեր: Իսկ օրենքն ասում է հետևյալը.
«Եթե Ազգային ժողովը հերթական նստաշրջանի երեք ամսվա ընթացքում որոշում չի կայացնում կառավարության որոշմամբ անհետաձգելի համարվող օրենքի նախագծի վերաբերյալ:
Հերթական նստաշրջանի ընթացքում Ազգային ժողովի նիստերը երեք ամսից ավել չեն գումարվում
Հերթական նստաշրջանի ընթացքում Ազգհային ժողովը երեք ամսից ավել իր կողմից քննարկվող հարցերի վերաբերյալ որևէ որոշում չի կայացնում»։
Սա է եղել քննարկվող հարցի իմաստը»,-ավելացրել է պատգամավորը: