Քութայիս քաղաքում հունիսի 17-20-ը կայացած երիասարդների սուսերամարտի միջազգային մրցաշարին, որին մասնակցում են Հայաստանի, Վրաստանի և Ադրբեջանի հավաքականները, հայ մասնակիցները բերել են 1 ոսկե, 2 արծաթե և 5 բրոնզե մեդալներ։ «Ճկասուսեր» մարզաձևում առաջին հորիզոնականը զբաղեցրել է Արփինե Աթոյանը, իսկ Հասմիկ Աղաբաբյանը գրավել է 3-րդ հորիզոնականը։ «Խոցասուսեր» մարզաձևում Էմմա Պողոսովան արժանացել է բրոնզե մեդալի։
Հայաստանի սուսերամարտի ֆեդերացիայի գլխավոր քարտուղար Արտաշես Մադոյանի խոսքով՝ սուսերամարտի միջազգային մրցաշարին Հայաստանի հավաքականի թիմում ընդգրկված էին Բյուրեղավանի «Քեթրին» սուսերամարտի ակումբի սաները։ «Ստացած մեդալների քանակը վկայում է այն մասին, որ հայ մասնակիցները լավ են ելույթ ունեցել»,- ասաց Ա. Մադոյանը` նշելով, որ չնայած դրան, սպասելիքները մրցաշարից ավելի շատ էին։ «Մեր ներկայացուցիչների խնդիրը հիմնականում այն էր, որ նրանք մյուս մասնակիցներից տարիքով ավելի փոքր էին»,- ասաց նա։
Ա. Մադոյանը նաև նշեց, որ Հայաստանում սուսերմարատի ավանդույթները գնալով ավելի ամուր հիմքների վրա են դրվում։ «Երեխաների շրջանակում այն ավելի մեծ տարածում է գտնում»,- շեշտեց նա` ավելացնելով, որ ոլորտը զարգացնելու համար պետք է հնարավորինս շատ մրցաշարերի մասնակցել։
