Ֆրանսիան կշարունակի փոխգործակցել Լեռնային Ղարաբաղի խնդրի կարգավորմանը՝ ելնելով տարածաշրջանի ժողովուրդների շահերից։ Այս մասին ասվում է ուրբաթ Ելիսեյան պալատի տարածած հաղորդագրությունում, որն ամփոփում է Ֆրանսիայի նախագահ Էմանուել Մակրոնի և նրա ադրբեջանցի գործընկեր Իլհամ Ալիևի հանդիպումը։
«Երկու երկրների նախագահները կարծիքներ են փոխանակել Լեռնային Ղարաբաղի հակամարտության շուրջ։ Որպես ԵԱՀԿ Մինսկի խմբի համանախագահ՝ Ֆրանսիան տարածաշրջանում երկարատև խաղաղություն ապահովելու առանձնահատուկ պատասխանատվություն է կրում»,-ասվում է Ելիսեյան պալատի հայտարարությունում։
«Ֆրանսիայի նախագահն ընդգծել է, որ կշարունակի աշխատել բանակցությունների հիման վրա լուծումներ գտնելու շուրջ, որը հակամարտությանը երկար ժամամակով վերջ դնելու միակ տարբերակն է՝ տարածաշրջանի ժողովուրդների շահերից ելնելոբ»,-ընդգծվում է հաղորդագրությունում։
Դրանում նաև ընդգծվում է, որ Մակրոնը «հուլիսի 11-ին Բրյուսելում ողջունել է Հայաստանի և Ադրբեջանի ԱԳՆ ղեկավարների հանդիպումը»։
«Ֆրանսիայի նախագահն ուշադրությամբ կհետևի իրավիճակին, և Ֆրանսիան՝ ռուս և ամերիկացի համանախագահների հետ միասին, նախաձեռնություն կստանձնի՝ կարգավորման գործընթացում առաջընթաց ձեռք բերելու համար»,-ասվում է Ելիսեյան պալատի հաղորդագրությունում։