ՀՀԿ-ական պատգամավոր Գագիկ Մինասյանի գնահատմամբ՝ ադրբեջանական կողմի մոտեցումները ԼՂ հարցում էապես չեն փոխվել, ինչը, սակայն, որևէ ազդեցություն չի գործում միջազգային հանրության վրա:
Անդրադառնալով հունիսի 24-ին Կազանում կայանալիք հանդիպմանը՝ Մինասյանը նկատեց, որ նման բարդ կոնֆլիկտներում արդյունքները սովորաբար հեղափոխական չեն լինում. «Քննարկումները քայլ առ քայլ մոտեցնում են մի իրավիճակի, որը վերջում արձանագրվում է որպես անխուսափելի իրողություն»:
Այդուամենայնիվ, Մինասյանը կարծիք հայտնեց, որ հիմնարար սկզբունքները Կազանում չեն ստորագրվի:
«Առաջին լրատվական»-ի հարցին, թե նախօրեին Իրանի նախագահի հեռախոսազրույցը Հայաստանի և Ադրբեջանի նախագահների հետ որևէ կապ ունի՞ Կազանում սպասվելիք հանդիպման հետ, Գագիկ Մինասյանը պատասխանեց. «Չեմ կարող միանշանակ «այո» ասել, բայց հակված եմ ենթադրելու՝ դժվար է պատկերացնել, որ մեր տարածաշրջանում էական դեր ունեցող Իրանի Հանրապետությունը, որը սահմանակից է Ղարաբաղին, Հայաստանին և Ադրբեջանին, հետաքրքրված և շահագրգիռ չլինի ԼՂ բանակցային գործընթացով: Կարծում եմ, որ այդ զանգերի ընթացքում քննարկվել են հենց Իրանի նախագահին հետաքրքրող խնդիրներն այդ գործընթացի վերաբերյալ»:
ՀՀԿ-ական պատգամավորի խոսքերով՝ ԼՂ հարցի լուծման իրենց ցանկալի տարբերակը իրանյան տարբեր պաշտոնյաներ հայտնել են և հստակ է, որ նրանց համար կարևոր է տարածաշրջանում կայունությունը և այն, որ որևէ այլ՝ ոչ տարածաշրջանային երկիր իր ռազմական ներկայությունը չունենա տարածաշրջանում: