Սերժ Սարգսյանի պատասխանը ՀԱԿ-ի երկխոսության առաջարկին ՀՌԱԿ ատենապետ Էդուարդ Անտինյանը շատ հստակ և սպասելի է գնահատում։
«Արաբական հեղափոխություններից հետո, երբ ՀԱԿ-ը ոգևորված էր, իշխանությունը ստորագրեց կոալիցիոն հուշագիրը և արմատական ընդդիմության հետ երկխոսության գնալու նվազագույն քայլն արեց։ Միանգամայն պարզ է, որ, իրոք, երկխոսության նախաձեռնությունը իշխանությանն է»,- ասում է ՀՌԱԿ ատենապետը։ Ըստ Էդուարդ Անտինյանի՝ իշխանությունը այս փուլում լուծեց հանկարծակիության խնդիրը, և սպառեց արաբական հեղափոխությունների տարածումը հայկական քաղաքական դաշտում, ինչը, ըստ Անտինյանի, ՀԱԿ-ի ուզածն էր։
ՀՀԿ պատգամավոր Հակոբ Հակոբյանը դրական է գնահատում ստացված արդյունքը։ «Վերջապես արմատական ընդդիմությունը ընդունեց իշխանության երկխոսելու առաջարկը»,- ասում է Հակոբ Հակոբյանը։
Սերժ Սարգսյանի այն հայտարարությունը, որ ՀԱԿ-ը, արտահերթ ընտրությունների առաջարկով պետք է դիմի ԱԺ նախագահին՝ Հակոբ Հակոբյանը բացատրում է ոչ թե արտահերթ ընտրություններ հայտարարելուց խուսափելու ցանկությամբ, այլ Սահանադրության համապատասխան դրույթով։
«Հանրապետության նախագահը չի կարող արտահերթ ընտություններ հայտարարել։ Ըստ սահմանադրության՝ դա պետք է արվի վարչապետի կամ ԱԺ նախագահի միջնորդության դեպքում»,- ասում է հանրապետական պատգամավորը։
ՀՌԱԿ ատենապետը, այնուամենայնիվ, բացառում է արտահերթ ընտրությունների հավանականությունը, քանի որ շատ քիչ ժամանակ է մնացել մինչև հերթական ընտրություններ։ «Արտահերթ ընտրությունների պահանջով ՀԱԿ-ը փորձում է «իր դեմքը փրկել»,- կարծում է Էդուարդ Անտինյանը։