Ադրբեջանական APA լրատվական գործակալության փոխանցմամբ՝ հայամետ կոնգրեսական Նենսի Փելոսին առաջին անգամ համաձայնել է հանդիպել թուրքական համայնքի անդամների հետ։ Ակնկալվում է, որ այդ հանդիպումը տեղի կունենա մոտակա օրերին։
Այս կապակցությամբ թուրքական համայնքի ներկայացուցիչ Մուսթաֆա Յըլմազը հայտարարել է. «Մենք նրան կփոխանցենք մի շարք խնդիրների շուրջ Թուրքիայի ու Ադրբեջանի դիրքորոշումը, ինչպես նաև կպատմենք ղարաբաղյան հակամարտության արդյունքում Ադրբեջանին հայերի տված վնասի մասին։
Մենք չենք ակնկալում, որ նա իսկույն ևեթ կփոխի իր դիրքորոշումը որոշակի հարցերի շուրջ, սակայն այդ հանդիպումը շատ կարևոր է։ Դա անգամ պատմական հանդիպում է մեր համայնքի համար»։
Հիշեցնենք, որ ներկայումս ԱՄՆ-ում կրկին ներկայացվել է Հայոց ցեղասպանության ճանաչման բանաձևը, որը երկու կուսակցությունների ներկայացուցիչներից և իրավաբաններից կազմված խմբի համատեղ բանաձև է: Բանաձևը, որը հրապարակել է կոնգրեսական Ադամ Շիֆը, կոչ է անում ԱՄՆ նախագահին և դաշնային կառավարությանը ճանաչել այն վայրագությունները, որոնք տեղի են ունեցել անցած դարի սկզբին:
