Հայաստանի մինչև 20 տարեկանների հավաքականի գլխավոր մարզիչ Միքայել Պողոսյանը ՀԲՖ մամուլի քարտուղարության հետ զրույցում մեկնաբանել է Բուլղարիայում ընթացող Եվրոպայի B դիվիզիոնի առաջնության ընթացքը
Մինչև 20 տարեկանների Եվրոպայի B դիվիզիոնի առաջնությունում Հայաստանի հավաքականն անցկացրել է 3 հանդիպում, որոնցում կրել է նույնքան պարտություն.
– Ցավոք սրտի մենք առանց նախապատրաստական աշխատանքների ենք ժամանել Բուլղարիա, քանի որ ֆինանսական խնդիրների պատճառով չհաջողվեց անցկացնել ուսումնամարզական հավաք:
Մենք միակ հավաքականն ենք Եվրոպայի առաջնությունում, որը ստուգողական հանդիպումներ չի անցկացրել այլ երկրների հավաքականների հետ, բացի այդ մեր հիմնական կազմի 8 խաղացողներ տարբեր պատճառներով չեն միացել հավաքականին: Դրան պետք է հավելել նաև այն, որ գլխավոր մարզչի փոխարեն, ես եմ ստանձնել հավաքականի ղեկը, թեև նման փորձ չունեմ:
Ամեն դեպքում մենք փորձում ենք առավելագույնս անել Եվրոպայի առաջնությունում և պետք է այս առաջնությունը օգտագործենք փորձ ձեռք բերելու նպատակով: Ի՞նչու փորձ, որովհետև մեր թիմը երիտասարդ է և կազմված է 18-19 տարեկան խաղացողներից և այս խաղացողները մեկ երկու տարի դեռ կարող են հանդես գալ երիտասարդական հավաքականում, իսկ նրանցից ոմանք հնարավոր է հետագայում համալրեն ազգային հավաքականի կազմը:
Այս պահին մեր տրամադրության տակ է ընդամենը մեկ 20 տարեկան խաղացող, որը Ջասթին Կույումջյանն է, մնացած խաղացողները երիտասարդ են:
Մեր մրցակիցները բավական ուժեղ էին, թեև մենք կարող էինք ավելի լավ հանդես գալ, մասնավորապես առաջին խաղում կարող էինք հաղթել Լյուքսեմբուրգի հավաքականին, սակայն փորձի պակասն ու խաղակցվածությունը թույլ չտվեց հասնել դրական արդյունքի:
Լյուքսեմբուրգի հավաքականը մինչ այս անցկացրել էր մի շարք ստուգողական հանդիպումներ, ինչը զգացվեց մեր դեմ մրցավեճում. մրցակիցն ավելի կազմակերպված խաղ ցույց տվեց, իսկ մենք փաստորեն անցկացնում էինք առաջին պաշտոնական խաղը նման կազմով, և դեռ բազմաթիվ խնդիրներ կային, որոնք ի հայտ եկան այդ մրցավեճում:
Ապագայում մենք պետք է լուրջ հետևություններ անենք, եթե ցանկանում ենք հաջող հանդես գալ Եվրոպայի առաջնություններում: Առանց ուսումնամարզական հավաքների և առանց ստուգողական հանդիպումների հնարավոր չէ Եվրոպայում մրցել որևէ հավաքականի հետ, մանավանդ B դիվիզիոնում, որտեղ հանդես են գալիս Եվրոպական մի շարք առաջատար հավաքականներ մասնավորապես ներկայումս մենք Բուլղարիայում տեսնում ենք, Ռուսաստանի, Լատվիայի և Սլովենիայի պես առաջատար բասկետբոլային երկրների, – եզրափակել է Պողոսյանը: