Այսօր «Հայկական ժամանակ» թերթի խմբագրությունում մի շարք թերթերի խմբագիրներ մամլո ասուլիս էին հրավիրել` ի պաշտպանություն և ի ազատում «Հայկական ժամանակ» թերթի գլխավոր խմբագիր Նիկոլ Փաշինյանի: Պարզվում է, որ Նիկոլ Փաշինյանը դատապարտվել է15 օր պատժախցում լինելու, և նրա կյանքին վտանգ է սպառնում:
Ասուլիսը մեկտեղել էր Աննա Հակոբյանին(«Հայկական ժամանակ»), Արամ Աբրահամյանին («Առավոտ»), Մեսրոպ Մովսեսյանին («Ա1+»), Սաթիկ Սեյրանյանին («168 ժամ»), Արգիշտի Կիվիրյանին (armtoday.info), Էդիկ Բաղդասարյանին (hetq.am), Արմինե Օհանյանին («Հրապարակ»), Շողեր Մաթևոսյանին («Չորրորդ ինքնիշխանություն»), Արման Բաբաջանյանին («Ժամանակ»), Հայկազ Ղահրիյան (lragir.am), Գևորգ Էմին-Տերյանին (1in.am), Յուրի Մանվելյան (epress.am):
«Առավոտ» թերթի խմբագիր Արամ Աբրահամյանը իր խոսքում նշեց, որ եթե մարդուն ձերբակալում են և հետապնդում իր գործերի համար, դա անընդունելի է: Բոլոր պարկեշտ մարդիկ պետք է իրենց ձայնը բարձրացնեն:
«Ա1+»-ի հիմնադիր, «Մելտեքս» ՍՊԸ նախագահ Մեսրոպ Մովսեսյանը հավելեց, որ այսօր Նիկոլի վրա կրիմինալ չկա: «Մենք ուզում ենք, որ մեր երկիրը շիտակ ճանապարհով գնա, ժողովուրդը շնչի, իսկ շնչելու համար օդ է հարկավոր, այդ օդը մեզ մամուլն է տալիս: Պետք է բոլորը միանան մեզ` թե’ լրատվամիջոցները, թե’ մտավորականները, թե’ սովորական քաղաքացիներ»,- ասաց Մ.Մովսեսյանը և պահանջեց, որ անհապաղ ազատ արձակվի Նիկոլ Փաշինյանը, որովհետև պետությունը ի վիճակի չէ ապահովելու նրա անվտանգությունը:
«Ժամանակ» օրաթերթի գլխավոր խմբագիր Արման Բաբաջանյանն էլ հավելեց, որ Նիկոլի հետ կատարվողը կապ ունի Նիկոլի գործի հետ: Բոլորիս միավորողը պետք է լինի Նիկոլի ազատության հարցը:
Վերջում խմբագիրներն այն համոզմունքը հայտնեցին, որ համատեղ, շարունակական և միասնական պայքարի դեպքում Նիկոլ Փաշինյանին ազատ կարձակեն: