Թերթը գրում է, որ հայկական պատվիրակությունը հրաժարվել է մասնակցել ԼՂՀ խնդրով զբաղվող ենթահանձնաժողովի աշխատանքներին: Այդ մասին երեկ ԵԽԽՎ ամառային նստաշրջանի աոաջին նիստի ժամանակ հայտարարել է հայկական պատվիրակության ղեկավար Դավիթ Հարությունյանը. «Իմաստ չունի մասնակցել և լսել բազմիցս լսված անհիմն մեղադրանքներ և ուղղակի պրոպազանդա: Դա մենք բավարար լսում ենք այստեղ՝ նիստի ժամանակ»,- ելույթի ժամանակ նաև այսպես է հիմնավորել Դավիթ Հարությունյանը հայկական պատվիրակության բոյկոտը: Նախորդ առաջարկությամբ Դավիթ Հարությունյանը կոչ էր արել սկսել ձեռնարկել քայլեր փոխադարձ վստահության ձևավորման ուղղությամբ՝ աոնվազն երկու պատվիրակությունների միջև որպես աոաջին նվազագույն քայլ»,- գրում է թերթը:
«Նպատակն այն էր, որպեսզի քննարկումներ սկսվեն երկու պատվիրակությունների միջև ոչ ավելի քան մեկ միջնորդի մասնակցությամբ, որը չի կարող լինել Ասամբլեայի ղեկավարը կամ այս ժամանակավոր հանձնաժողովի նախագահը»,- «Ա1+»-ին մանրամասնել է Դավիթ Հարությունյանը:
«Ավելին, մեր պատվիրակությունը առաջարկել է վեհաժողովի նիստերի ժամանակ փոխադարձ մեղադրանքների մորատորիում հայտարարել, առաջարկն արվել է շատ վաղուց, իսկ նախորդ անգամ հենց վեհաժողովի նիստի ժամանակ Դավիթ Հարությունյանը հրապարակային հնչեցրել է առաջարկը: Իսկ այսօր նա նշեց, որ այդ առաջարկը մնացել է անարձագանք»,- գրում է «Առավոտ»-ը և մեջբերում. «Եվ ես որպես աոաջին քայլ հայտարարում եմ միակողմանի մորատորիում և կոչ եմ անում, որպեսզի Ադրբեջանի պատվիրակությունը միանա այդ մորատորիումին»,- ԵԽԽՎ նիստի ժամանակ այսօր հայտարարեց Դավիթ Հարությունյանը:
«Մորատորիումը միանգամից մերժվեց ադրբեջանական պատվիրակության կողմից, քանի որ Հարությունյանին հաջորդող ելույթում պատգամավոր Փաշաևան նորից հիշեցրեց 15 տարվա իրենց «օկուպացված տարածքների» մասին,- գրում է թերթը. «Սա հենց այն էր, ինչի մասին բազմիցս զգուշացրել ենք, որ խոսակցությունները, թե այդ ժամանակավոր հանձնաժողովը կոչված է լինելու ստեղծել փոխադարձ վստահության մթնոլորտ, ի չիք են դառնում, որովհետև երբ դրան մասնակցում են պատգամավորները, այդ գործընթացը, որպես կանոն, ունենում է շատ վատ պրոպագանդիստական նպատակ, իսկ այն, ինչ մենք ենք աոաջարկում, խոհեմ, սթափ մոտեցումն է»,- եզրափակել է Դավիթ Հարությունյանը:
«Իսկ Եվրոպայի խորհրդի խորհրդարանական վեհաժողովի նախագահ Մևլութ Չավուշօղլուի կարծիքով՝ հայ-թուրքական հարաբերություններն էականորեն կապված են Հայաստանի և Ադրբեջանի նախագահների Կազանում նախատեսված հանդիպման արդյունքների հետ: Երեկ Ստրասբուրգում կայացած մամուլի ասուլիսում պատասխանելով «Ազատություն» ռադիոկայանի հարցին՝ ի՞նչ ակնկալիքներ ունի Կազանում Հայաստանի և Ադրբեջանի նախագահների միջև նախատեսված հանդիպումից, պարոն Չավուշօդլուն ասել է. «Ես բոլորից շատ եմ ցանկանում, որպեսզի Հայաստանի և Ադրբեջանի նախագահները այս ամիս Կազանում կայանալիք հանդիպման ժամանակ ստորագրեն հակամարտության կարգավորման հիմնարար սկզբունքների մասին համաձայնագիրը: Չեմ կարծում, որ որևէ մեկը ոչ կասի այդ համաձայնագրին: Մենք կողջունենք այդ առաջընթացը»,- հայտնում է թերթը և հավելում. «Հայ-թուրքական հարաբերությունների մասին խոսելով՝ ասել է, թե այս հարցը ուղղակիորեն կապված է Կազանում կայանալիք հանդիպման արդյունքների հետ. «Ինչ վերաբերում է հայ-թուրքական հարաբերություններին, ապա դա ուղղակիորեն կապված է աոաջին հարցի հետ՝ արդյոք երկու ղեկավարների միջև կլինի՞ համաձայնագիր: Թուրքիան ունի որոշակի պայմաններ, ինչի մասին Թուրքիայի վարչապետը մի քանի անգամ մեկնաբանություններ է արել: Եվ եթե այդ պայմանները կատարվեն, կարծում եմ, որ հայ-թուրքական արձանագրությունները կվավերացվեն խորհրդարանում»: