Այսօր Նյու Յորքում կայանալու է եռակողմ հանդիպում, որին մասնակցելու են Կիպրոսի նախագահ Դիմիտրիս Խրիստոֆիասը, Հյուսիսային Կիպրոսի թուրքական ինքնահռչակ հանրապետության ղեկավար Դերվիշ Էրօղլուն և ՄԱԿ-ի գլխավոր քարտուղար Բան Կի-Մունը:
Հրավերը Բան Կի-Մունինն է: Կիպրոսի խնդրի շուրջ բանակցությունները ընթանում են ՄԱԿ-ի հովանու ներքո, կողմերը քննարկելու են Կիպրոսի վերամիավորմանն ուղղված խաղաղ բանակցությունների ներկայիս փակուղային վիճակը:
Կիպրոսի թուրքական հատվածի ղեկավար Դերվիշ էրօղլուն կարծիք է հայտնել, որ Նյու Յորքում կայանալիք եռակողմ բանակցությունները բեկումնային և շրջադարձային կլինեն Կիպրոսի խնդրին երկարաժամկետ լուծում գտնելու հարցում:
Ելույթ ունենալով Հյուսիսային Կիպրոսի ինքնահռչակ հանրապետության 27-ամյակի կապակցությամբ` Էրօղլուն հայտարարել է, որ հարկ է ճեղքել բանակցություններում առկա փակուղին և առաջ գնալ:
Նա հայտարարել է, որ Կիպրոսի թուրքերը չեն ցանկանում հավետ կաշկանդված մնալ բանակցային գործընթացով և այդպիսով դուրս գտնվել միջազգային հանրությունից: էրօղլուն ասել է, թե իրենք ցանկանում են տեսնել ընդհանուր պատկերը և հասկանալ, թե ինչ քայլեր կձեռնարկի միջազգային հանրությունը, եթե երկու կողմերը չկարողանան համաձայնության հասնել:
Կիպրոսի թուրքական հատվածի ղեկավարը նաև կոչ է արել Եվրամիությանը` շոշափելի քայլեր կատարել և վերացնել իրենց նկատմամբ կիրառվող տնտեսական մեկուսացումը:
Հիշեցնենք, որ Կիպրոսի հունական և թուրքական հատվածների միջև բանակցությունների ներկայիս փուլը սկսվել է 2008թ.-ին:
