Ադրբեջանի նախագահ Իլհամ Ալիևը հայտարարել է, որ Բաքուն որոշակի դեր է խաղացել 2018 թվականի գարնանը Հայաստանում տեղի ունեցած իշխանափոխության հարցում։ Ալիևի խոսքերը մեջբերում է Minval պարբերականը։
«Մենք մեր դերն ունենք Հայաստանի քաղաքական հարթակից Սերժ Սարգսյանի քրեական ռեժիմին հեռացնելու գործում։ Ես չեմ ուզում այդ մասին խոսել և ուռճացնել մեր դերը։ Կարող եմ միայն ասել, որ մեկուսացման քաղաքականությունը, որը մենք կիրառում ենք Հայաստանի նկատմամբ, արդարացնում է իրեն»,– ասել է Ալիևը երկրի կառավարության նիստի ժամանակ։
Ալիևը Հայաստանի նախկին իշխանություններին «արնախումների խունտա» է անվանել։
«Այն, ինչ ես ասում էի, կրկնում է հայ ժողովուրդը։ Ես հայտարարել եմ դա ՄԱԿ–ի ամբիոնից, որ դա կոռուպցիոն խունտայի ռեժիմ է։ Հիմա դա կրկնում է հայ ժողովուրդը։ Ես ասում էի, որ դա արնախում, գողական, քրեական ռեժիմ է։ Հիմա դա կրկնում է հայ ժողովուրդը։ Հայաստանի տնտեսական ներուժը զրոյական է, նրանց հերոսները՝ գողեր են, գեներալները՝ գողեր են»,– ասել է Ադրբեջանի նախագահը։