Որքանո՞վ է ազդել ՆԱՏՕ-ի անդամակցությունը պետությունների ազգային տնտեսությունների վրա: ՀՀ նախկին վարչապետ Հրանտ Բագրատյանի կարծիքով, ՆԱՏՕ-ին անդամակցության և տնտեսության միջև անուղղակի կապ կարող է լինել։
«ՆԱՏՕ-ի սահմանները մոտավորապես համընկնում են այն երկրների հետ, որոնք ԵՄ կազմի մեջ են։ Բայց այնտեղ մտնում են նաև երկրներ, որոնք լրիվ ուրիշ տնտեսական շահեր ունեն։ Օրինակ՝ ԱՄՆ-ն ու Եվրոպան, ԱՄՆ-ն ու Կանադան այլ տնտեսական շահեր ունեն, ու որևէ ուղղակի կապ ՆԱՏՕ-ին անդամակցության և տնտեսությունների միջև չկա։
Ճիշտ է, պետք է ՆԱՏՕ-ի անդամ լինես, որպեսզի ունենաս այն ազատ ռեժիմները, որ ունեն ԵՄ երկրները։ Այսինքն՝ եթե դու ՆԱՏՕ-ի մեջ չես, քեզ քաղաքական բարեկամ չեն համարի։ Բայց կան երկրներ, որոնք ՆԱՏՕ-ի մեջ չլինելով` ԵՄ կամ ԱՄՆ հետ ոչ պակաս լավ հարաբերություններ ունեն, քան ՆԱՏՕ-ի անդամ երկրները։
Ավելին` օրինակ Թուրքիան այսօր ԵՄ հետ ունի ավելի վատ հարաբերություններ, քան Հայաստանը՝ տնտեսական ու իրավական տեսակետից։ Այնպես որ, ՆԱՏՕ-ին անդամակցությունը տնտեսությունների վրա կարող է ազդել միայն անուղղակիորեն»,- նշեց տնտեսագետը։