Ադրբեջանական News.az կայքին տված հարցազրույցի ժամանակ Գլոբալիզացիայի խնդիրների ինստիտուտի ղեկավար Միխայիլ Դելյագինն անդրադարձ է կատարել ղարաբաղյան հակամարտության կարգավորմանը.
«Ինձ շատ դուր եկավ Ադրբեջանի արտգործնախարար Էլմար Մամեդյարովի այն հայտարարությունը, որ եթե Կազանի հանդիպումն առաջընթաց գրանցի, ապա այն խաղաղություն կպարգևի տարածաշրջանին։ Դա շատ լավ է. առաջին հերթին դա մեզ որոշակի հույսեր է տալիս առաջընթացի գրանցման հետ կապված, և երկրորդ՝ պատերազմ տեղի չի ունենա։
Սակայն ես կարծում եմ, որ Կազանում բեկում չի գրանցվի, փոխարենը կգրանցվեն աննշան քայլեր առաջ, ինչն էլ տվյալ փուլում կբավարարի բոլոր կողմերին։ Այդպիսով, մենք կունենանք ոչ թե լարվածության էսկալացիա, այլ՝ դրա նվազում։
Արդեն մի քանի տարի է, ինչ Բաքուն խոսում է պատերազմի վերսկսման հնարավորության մասին։ Ես կարծում եմ, որ եթե մոտ ապագայում առաջընթաց չգրանցվի, ապա շփման գծում լարվածությունը կաճի, թեև այն չի հանգեցնի լիարժեք պատերազմի։
Բացի այդ, Ռուսաստանում առկա է հայկական ու ադրբեջանական մեծ սփյուռք, ինչը նշանակում է, որ Ղարաբաղում պատերազմի վերսկսումը կարող է Ռուսաստանում բախումներ առաջացնել տեղի հայերի ու ադրբեջանցիների միջև»։
