Երեկ վարչապետ Նիկոլ Փաշինյանն ընդունել էր տարբեր տարիներին զինվորական ծառայության ընթացքում տարբեր հանգամանքներում մահացած զինծառայողների ծնողներին, ովքեր տարիներ շարունակ պահանջում են պատժել իրենց որդիների մահվան մեղավորներին։ Սևազգեստ մայրերը մշտապես իրենց բողոքի ձայնը բարձրացրել են, սակայն անարդյունք։
Մայրերը Փաշինյանի հետ հանդիպման ժամանակ ներկայացրել են քրեական գործերի քննության և դատավարությունների հետ կապված իրենց տեսակետները, այն հանգամանքները, որոնք, ըստ նրանց, կարող են գործերի բացահայտման հիմքեր հանդիսանալ ու որոնք նախկինում իրավապահ մարմինների կողմից ինչ-ինչ պատճառներով չեն դիտարկվել:
«Առաջին լրատվական»-ի հետ զրույցում 2010 թվականին բանակում խաղաղ պայմաններում մահացած զինծառայող Արթուր Ղազարյանի մայրը՝ Իրինա Ղազարյանն ասաց, որ Նիկոլ Փաշինյանի հետ արդեն 8 տարի է՝ շփվում են, վերջինս տեղյակ է խնդրին, բայց իրավապահ և պաշտպանական համակարգում դեռ կան մարդիկ, ովքեր պետք է դուրս գան, գործերն էլ բացահայտվեն։
«Մենք շատ անգամներ ենք հանդիպել կառավարության ղեկավարների, տարբեր պաշտոնյաների հետ։ Այն տպավորությունն էր, որ այնտեղ օլիգարխներով հավաքված էին, ճնշող բան կար, իրենց համար ոնց որ մեկ լիներ զոհվածի մոր խոսքը։ Բայց երեկ, որ մտանք Նիկոլ Փաշինյանի մոտ, զուտ հասարակ, մարդկային, դեմքին նայում ես՝ գիտես, որ ինքն էլ տղա ունի, ծնողի դրության մեջ մտնում է։ Թեկուզ եթե ինչ-որ բան էլ չստացվի, գոնե գիտես՝ այդ դրական բաները թերությունների կեսն էլ փակում են։
Բայց որ նայում ես տգետներով հավաքված էին, երեխեքին տանում էին բանակ, կյանքը խլում էին ու մի հատ էլ ժպտում էին։ Նիկոլ Փաշինյանն ասաց՝ ամեն ինչ կանենք բացահայտելու համար։ Նա ասաց՝ քննչականին, դատախազությանը կասենք, եթե վերջում բան չլինի, ես կդիմեմ անվտանգության կազմին (ԱԱԾ-ին-խմբ․), որին ես վստահում եմ, դուք էլ վստահեք։ Այդ ժամանակ ինչ-որ մի բան կլինի։ Մեր գործերը բացահայտված են, բայց պաշտոնյաներ կան, որոնց ձեռք չի տալիս գործերի բացահայտումը։ Փաշինյանից հույսս չեմ կտրում, բայց որ ասեմ՝ 100 տոկոսով համոզված եմ, որ ինչ-որ բան․․․ »,- ներկայացրեց զոհված զինվորի մայրը։
Հարցազրույցն ամբողջությամբ՝ տեսանյութում։
