Մինչև 21-րդ դարի կեսը Տոկիոյից Փարիզ ավիաուղևորությունը կկազմի ընդամենը երկուսուկես ժամ (ներկայիս 13 ժամի փոխարեն): Սա հնարավոր կլինի եվրոպական EADS (Airbus օդանավեր արտադրող ընկերություն) ավիատիեզերական կորպորացիայի կողմից կառուցվելիք Zehst պայմանական անվանումով ինքնաթիռի շնորհիվ: Այս մասին գրում է The Daily Mail-ը:
Օդանավի ուղևորատարությունը կլինի 50-100 ուղևոր: Այն սկզբից բարձրություն կհավաքի ծովային ջրիմուռից սինթեզված բիովառելիքով աշխատող ռեակտիվ շարժիչների շնորհիվ: Այնուհետև կմիանան երկու այլ շարժիչներ, որոնք արդեն կաշխատեն ջրածնի և թթվածնի խառնուրդով:
Նոր ինքնաթիռը հնարավորություն կունենա բարձրանալ մինչև 32 կմ, որտեղ այն հնարավորություն կունենա 4 անգամ գերազանցելու ձայնի արագությունը: Ներկա պահին ինքնաթիռները բարձրանում են մինչև 10-11 կմ: Սրա նախատիպը պատրաստ կլինի արդեն 2020 թ., և հետագա 30 տարիների ընթացքում կիրականացվեն օպտիմալացման աշխատանքներ: Նախագիծն իրականացվում է Ճապոնացիների հետ:
