Ադրբեջանական Trend լրատվական գործակալության փոխանցմամբ, ԵԽԽՎ թուրք նախագահ Մևլութ Չավուշօղլուն ամառային նստաշրջանի առաջին աշխատանքային օրվա կապակցությամբ մամլո ասուլիս է տվել՝ անդրադարձ կատարելով հայ-թուրքական հարաբերությունների կարգավորմանն ու հայ-թուրքական արձանագրությունների վավերացմանը.
«Պետք է նշել, որ հայ-թուրքական հարաբերությունների կարգավորումը «սերտորեն կապված է» Կազանում կայանալիք Հայաստանի ու Ադրբեջանի նախագահների հանդիպման հետ։ Թուրքիայի վարչապետը նույնպես առաջադրել է մի շարք նախապայմաններ՝ Հայաստանի հետ դիվանագիտական հարաբերություններ հաստատելու և թուրքական խորհրդարանում հայ-թուրքական արձանագրությունների վավերացման համար։
Նա ընդգծել է, որ եթե այդ պայմանները բավարարվեն, ապա թուրքական խորհրդարանը «կվավերացնի» հայ-թուրքական արձանագրությունները։ Այստեղ խոսքը գնում է երկու երկրների միջև համաձայնագրի կնքման մասին, որը ներառում է մի շարք պայմաններ։ Այդ պայմանների թվում կան նաև չգրվածները (փաստաթղթում տեղ չգտածները)։ Դուք դա գիտեք։
Այժմ արձանագրությունների վավերացումը կախված է երկու երկրների կողմից այդ պայմանների ընդունումից։ Այդ արձանագրությունները ստորագրվել են Ֆրանսիայի ու Ռուսաստանի արտգործնախարարների, ինչպես նաև ԱՄՆ պետքարտուղարի մասնակցությամբ»։
Փաստորեն, այս հայտարարությամբ Չավուշօղլուն միտումնավոր բարձրաձայնում է հայ-թուրքական արձանագրությունների ստորագրման գործընթացին մասնակցած Ֆրանսիայի, Ռուսաստանի ու ԱՄՆ-ի անունները, քանի որ նրանք հանդիսանում են ԵԱՀԿ Մինսկի խմբի համանախագահող երկրներ։ Նման կերպ Չավուշօղլուն փորձում է արդարացնել կամ հիմնավորել իր երկրի կողմից հայ-թուրքական արձանագրությունների վավերացման շաղկապումը ղարաբաղյան հակամարտության գործընթացի հետ։
Ինչ վերաբերում է Չավուշօղլուի կողմից հայ-թուրքական արձանագրությունների վավերացման խոստմանը, ապա նա «մոռանում» է, որ Թուրքիայում իշխող «Արդարություն և զարգացում» կուսակցությանը (ԱԶԿ, որի անդամն է նաև Չավուշօղլուն) հունիսի 12-ի խորհրդարանական ընտրությունների արդյունքներով չի հաջողվել անգամ 330 մանդատ ստանալ։
Դա նշանակում է, որ ԱԶԿ-ն միայնակ ի վիճակի չէ հայ-թուրքական արձանագրությունների վավերացման խնդիրը ներկայացնել թուրքական խորհրդարանի հաստատմանը, քանի որ քվեարկության դրվելուց առաջ նախ այդ հարցը պետք է հավանության արժանանա 550 հոգանոց Մեջլիսի նվազագույնը 330 պատգամավորի կողմից։ Իսկ արձանագրությունների վավերացումն արդեն իսկ պահանջում է 367 պատգամավորի աջակցություն։
Պետք է նկատել, որ դեռևս նախորդ տարվա սեպտեմբերի 12-ին Թուրքիայում կայացած սահմանադրական բարեփոխումների հանրաքվեից առաջ ԱԶԿ-ն ի վիճակի չեղավ խորհրդարանի հավանությանն արժանացնել մի շարք կետեր, քանի որ որոշ ԱԶԿ-ականներ դեմ էին քվեարկել իրենց կուսակցության առաջադրած սահմանադրական ուղղումներին։
