Հունիսի 20-ին ԱԳ նախարար Էդվարդ Նալբանդյանն ընդունեց պաղեստինյան «Ֆաթհ» շարժման միջազգային հարաբերությունների դեպարտամենտի ղեկավար, նախկին ԱԳ նախարար Նաբիլ Շաասին:
Ողջունելով հյուրին՝ արտգործնախարար Նալբանդյանը նշեց, որ Հայաստանը և հայ ժողովուրդը ամենաջերմ զգացմունքներն է տածում արաբական ժողովուրդների ու պաղեստինյան ժողովրդի նկատմամբ, որոնց հետ մեզ կապում է դարավոր բարեկամությունը և այսօր էլ Հայաստանը դինամիկ հարաբերություններ է զարգացնում արաբական երկրների հետ: «Հայ ժողովուրդը երբեք չի մոռանա, թե ինչպես Ցեղասպանությունից մազապուրծ եղած նրա հազարավոր զավակները ապաստան գտան արաբական երկրներում»,- ասաց Էդվարդ Նալբանդյանը:
Անդրադառանալով հայ-պաղեստինյան առնչություններին՝ Էդվարդ Նալբանդյանը նշեց, որ Հայաստանի Նախագահը որպես պետության ղեկավար առաջիններից էր, որ դեռևս 2000 թվականին պաշտոնական այցելեց Ռամալահ և հանդիպումն էր ունեցավ Պաղեստինյան ինքնավարության ղեկավարության հետ:
Նախարար Նալբանդյանն ասաց, որ Հայաստանն ուշադրությամբ հետևում է արաբական երկրներում տեղի ունեցող վերջին զարգացումներին, հույս հայտնելով, որ տարածաշրջանում առկա արմատական խնդիրները կլուծվեն ժողովրդավարական բարեփոխումների իրականացման ճանապարհով, և դրանց արդյունքները կնպաստեն ներազգային համերաշխության և կայունության հաստատմանը։
Հանդիպման ընթացքում զրուցակիցներն անդրադարձան երկկողմ հետաքրքրություն ներկայացնող մի շարք հարցերի, այդ թվում մերձավորարևելյան խնդրի կարգավորման գործընթացի ներկա փուլին և հեռանկարներին: «Հայաստանն աշխարհագրական առումով մոտ է մերձավորարևելյան տարածաշրջանին և մեծապես կարևորում է այնտեղ հարատև խաղաղության ու կայունության հաստատման ուղղությամբ գործադրվող ջանքերը: Այս առումով մենք ողջունում ենք այն նախաձեռնությունները, որոնք ուղղված են առկա խնդիրների արդարացի և կողմերի համար ընդունելի փոխզիջումային լուծմանը»,- ընգծեց Էդվարդ Նալբանդանը:
Նաբիլ Շաասը ներկայացրեց այս տարվա սեպտեմբերին ՄԱԿ-ի Գլխավոր Ասամբլեայում Պաղեստինի անկախության ճանաչման վերաբերյալ նախատեսվող քվեարկությանն ընդառաջ տեղի ունեցող գործընթացները, նաև շնորհակալություն հայնտեց, որ միջազգային կազմակերպություններում մերձավորարևելյան խնդրի կարգավորմանը վերաբերող հարցերում Հայաստանը մշտապես հավասարակշռված դիրքորոշման համար: Պաղեստինյան պատվիրակությունը Հայաստանի աջակցությունը հայցեց Պաղեստինի անկախության հռչակման գործընթացում: