Սերժ Սարգսյանի վերջին այցը Լեռնային Ղարաբաղ և այնտեղ անցկացված զորավարժությունները քաղաքագետ Սերգեյ Մինասյանը որակեց որպես բավականին լուրջ և կարևոր քայլ հարցի կարգավորման շրջանակներում. «Այդ զորավարժությունները աստրախանյան եռակողմ հանդիպման շարունակությունն էին, իսկ Աստանայում կայանալիք գագաթնաժողովից առաջ որոշակի նախապատրաստական գործընթացներ»։ Մինասյանի գնահատմամբ, Ռուսաստանի համար Աստանայում կայանալիք գագաթնաժողովը շատ կարևոր է, ինչի մասին է վկայում նաեւ աստրախանյան եռակողմ հանդիպումը։
Սերգեյ Մինասյանի կարծիքով, ԼՂ-ում Սերժ Սարգսյանի ելույթը և անցկացված զորավարժությունները պատասխան էին Ալիևի ռազմատենչ հայտարարություններին: Ըստ քաղաքագետի` պատերազմի հավանականութունը բացառվում է։ «Առաջին անգամ տարածաշրջանային կտրվածքով տեղի են ունեցել չափազանց լուրջ զորավարժություններ, այդ աստիճանի զորավարժություններ անգամ Ռուսաստանում շատ քիչ են եղել։ Չափազանց ուշագրավ էր, որ օգտագործվել են նոր զինատեսակներ, հետաքրքիր էր նաև Ադրբեջանի ռեակցիան»,-ասաց քաղաքագետը։
Վերջին շրջանում ղարաբաղա-ադրբեջանական շփման գծում հրադադարի ռեժիմի խախտումների նվազումը, Սերգեյ Մինասյանի կարծիքով, պայմանավորված է այն հանգամանքով, որ Ադրբեջանը դիվերսիոն հարձակումների մի քանի անհաջող փորձերից հետո հասկացավ, որ այդ քաղաքականությունն իր օգտին չէ. «Ադրբեջանը գիտակցում է, որ նման քաղաքականության շարունակությունը կհանգեցնի իր կողմից մարդկային կորուստների, իսկ ինֆորմացիոն առումով ինքը չափազանց կտուժի»։
