«Առաջին լրատվական»-ը զրուցել է ՀՀ տնտեսական զարգացման և ներդրումների նախարարության Արդյունաբերության զարգացման վարչության պետ Արմեն Եգանյանի հետ:
Վերջին մեկ-երկու տարիներին արդյունաբերության ոլոտը զարգանում է առաջանցիկ տեմպերով: Ահավասիկ, 2017թ. գրանցվել է արդյունաբերության 12.6%-անոց աճ: Այս տարեսկզբից նույնպես ոլորտում աճի համեմատաբար բարձր տեմպերը պահպանվում են: Օպերատիվ տվյալներով՝ հունվար-մայիս ժամանակային միջակայքում ոլորտում աճը կազմել է 3.3%: Հունվար-մայիսի ճյուղային կառուցվածքը դեռևս ԱՎԾ-ի կողմից չի հրապարակվել: Հունվար-ապրիլի կառուցվածքային ցուցանիշներով՝ ոլորտն աճել է 5.2%-ով: Թիվը շատ ավելի մեծ կլիներ, եթե հանքարդյունաբերությունում՝ 8.3%-անոց և էլեկտրաէներգիայի արտադրությունում 1.3%-անոց անկում չգրանցվեր: Իսկ հանքարդյունաբերությունում, մասնավորապես մետաղական հանքերի արտադրության ոլորտում, էական անկում է գրանցվել, որովհետև Թեղուտում աշխատանքները ժամանակավորապես դադարեցվել են: Այս պահին էլ Թեղուտը չի աշխատում, և դա իր բացասական ազդեցությունն ունենում է աճի տեմպերի առումով:
Որոշակի (2,1%) անկում է գրանցվել նաև մշակող արդյունաբերության, սննդամթերքի արտադրության ենթաճյուղում: Սա էլ պայմանավորված էր հիմնականում շաքարավազի արտադրության գործընթացով: Այստեղ որոշակի խնդիրներ կային հումքի մատակարարումների ուշացման առումով: Մայիսի վերջերին արտադրությունը վերականգնվել է, և այս ոլորտի դրական ցուցանիշները կարտացոլվեն արդեն հունիսի տվյալներում:
Մյուս ճյուղերում ընդհանուր առմամբ դրական միտումները պահպանվել ու զարգացել են: Կան ճյուղեր, որոնցում հունվար-ապրիլ ամիսներին 65, 70, 80%-անոց աճ է արձանագրվել: Թեթև արդյունաբերությունում աճը եղել է 84%: Այս ոլորտում մի կողմից՝ գործող ընկերությունները մեծացրել են իրենց արտադրության ծավալները, մյուս կողմից՝ նոր ընկերություններ են արտադրություններ գործարկել:
Աճ է արձանագրվել նաև խմիչքների արտադրության ոլորտում: Այստեղ տարեսկզբում, պայմանավորված արտահանման մատակարարման գրաֆիկների փոփոխությամբ, ծավալների անկում կար, որ կանխատեսելի էր և չանհանգստացնող: Հիմա արդեն ոլորտի ընկերությունների մի մասը սկսել է էական աճով աշխատել արտադրության և արտահանման ոլորտներում: Աճ է արձանագրվել նաև ծխախոտի արտադրության ոլորտում: Մշակող արդյունաբերության մյուս բոլոր ճյուղերում միասին վերցրած, բացի սննդի արտադրությունից, աճը կազմել է 12.4%:
Որոշակի անկում ունենք հիմնային մետաղների արտադրության ոլորտում, ինչը պայմանավորված է հիմնականում ընկերությունների կողմից մատակարարումների հետ կապված խնդիրներով, և որ կարևոր է՝ անկումի առումով ազդեցություն ունեցել են նաև ԱՄՆ-ի կողմից ռուսական ընկերությունների նկատմամբ կիրառվող սանկցիաները, մասնավորապես՝ «Ռուսալ-Արմենալի» վրա: Ընկերությունը դեռևս աշխատում է աճով և որոշակի աշխատանքներ է իրականացնում արտահանման ուղղությունների շեշտադրումների առումով: Հիմա արտադրանքն ավելի շատ դեպի եվրոպական շուկա են արտահանում: Բնականաբար աշխատանքներ են իրականացվում, որ վերականգնվի դեպի Միացյալ Նահանգներ արտահանումը:
Անաչառ լինելու համար նշեմ, որ վերջին ամիսներին, այնուամենայնիվ, արդյունաբերության ցուցանիշների աճի տեմպերի որոշակի անկում է գրանցվում: Ունենք աճի դանդաղում հինգ ամիսների կտրվածքով: Բայց այդ անկումը բոլորովին պետք չէ պայմանավորել հանրապետությունում տեղի ունեցած հեղափոխական իրադարձություններով: Դա ավելի շատ պայմանավորված է մեր խոշոր արտադրող ընկերությունների՝ մասնավորապես Թեղուտի՝ հունվարի վերջերից գործունեության ժամանակավոր դադարեցմամբ, պայմանավորված որոշակի տեխնիկական հարցերով, որ ներկայումս լուծվում են, նաև շաքարավազի արտադրությամբ, որի մասին նշեցի: Դանդաղումը պայմանավորվել է առավելապես այս երկուսով: Մնացած բոլոր դեպքերում բնականոն գործընթաց է զարգացել, և, իմ համոզմամբ, այս զարգացումների պայմաններում տարեվերջին աճային միտումներն ավելի ընդգծված կլինեն՝ հատկապես, որ հեղափոխական զարգացումներից հետո շատ են գործարարները, որ ցանկություն են հայտնում Հայաստանում նոր իրավիճակում բիզնես գործունեություն ծավալելու: Կան նաև այնպիսիք, որ նախկինում որոշել էին ու հիմա գալիս են:
Վերջին երկու ամիսներին շատացել են հայրենասիրական բիզնեսի դեպքերը, երբ գալիս են հայրենասիրական մղումներով՝ նշելով, որ իրենց համար շահույթը կարևոր չէ: Որպես կանոն, մեզ համար հարցին նման մոտեցումն անընդունելի է: Մեզ համար կարևորը հետևյալն է՝ եթե օտարերկրյա ներդրողը ցանկանում է Հայաստանում գործունեություն ծավալել, ճիշտն այն է, որ այստեղ ստանա կայուն շահույթ, որը հետագայում կդառնա հաջողված պատմություն այլ ներդրողներին ներկայացնելու համար:
Հիմա լուրջ ներդրումային ակնկալիքներ ունենք, որովհետև դրսի մարդկանց հետ հետաքրքիր ծրագրերի քննարկումներ ենք ունենում, բայց այս պահին իրադարձություններից առաջ ընկնել և դրանք հրապարակել չեմ ցանկանա: Այդուհանդերձ հավանականությունը մեծ է, որ քննարկվող, ուսումնասիրվող ներդրումային ծրագրերի հիմնական մասը իրականություն կդառնա: Ուղղակի չշտապենք, մի քիչ էլ սպասենք: