Ազգագրագետ Հրանուշ Խառատյանն այսօր հրավիրված ասուլիսի ընթացքում ահազանգեց երկու օր առաջ ՄԱԿ-ի կողմից մեր հուշարձանային փախստականների խնդրին: «ՅՈՒՆԵՍԿՕ-ն, խախտելով իր իսկ կողմից ընդունված բոլոր նորմերը, հայկական խաչքարերի ցուցադրության ժամանակ թույլ տվեց, որ այդ խաչքարերի պատկանելության բոլոր անունները հանվեն: Այսինքն՝ թույլ չտվեցին երևալ, որ այդ խաչքարերը Վանից են, Նախիջևանից, Ղարաբաղից, Ադրբեջանից: ՅՈՒՆԵՍԿՕ-ն, որը թե՛ կրոնական, թե՛ ազգային մշակույթի պաշտպանության առաքելություն ունի, կրոնական և ազգային մշակույթի այդ բարձրագույն գործերի ոչնչացմանը հանգիստ ականատեսի դերում է: Հետևաբար՝ այսօր ավելի քան ակտուալացնել է այս խնդիրը:
Արդյո՞ք պետք է մարդկությունը հույսեր կապի ՄԱԿ կոչվող կառույցի հետ, թե՞ նրանք գալիս են լրացնելու բռնությունների և ռասիզմի թելադրանքով առաջացած խնդիրները»,- բարձրաձայնեց Հրանուշ Խառատյանը և ավելացրեց, որ Ադրբեջանից ժամանակին փախչել են ոչ միայն հայեր, այլև ռուսներ, հրեաներ և հատկապես ուդիներ:
Հրանուշ Խառատյանը նաև նշեց, որ հայ փախստականների խնդիրը ոչ միջազգային, ոչ էլ տեղական օրակարգում չկա: Այդ թվում և Կազանում այն քննարկման ներկայացված չէ:
Հակառակը, հատկապես ՄԱԿ-ի փախստականների գլխավոր կոմիսարի հետ հանդիպելուց հետո Սերժ Սարգսյանը հայտարարեց, որ Հայաստանը փախստականների խնդիր չունի:
Լրագրողների այն հարցին, թե ինչպես են տեսնում խնդրի կարգավորումը, ադրբեջանահայերի համագումարի կազմկոմիտեի անդամ Արարատ Ծատուրյանը արձագանքեց. «Ինչպես սասունցիներն են երկրի կարոտ ապրում, այնպես էլ՝ մենք: Ավելին՝ մենք իրավունքն ունենք ապրել մեր տարածքում: Մենք պետք է վերադառնանք մեր հայրենի բնօրրանը: Ինչո՞ւ չէ, այդ թվում, անվտանգության երաշխավորման դեպքում՝ Բաքու, Սումգայիթ»:
