Ադրբեջանական APA լրատվական գործակալության փոխանցմամբ, այս շաբաթ Վաշինգտոնում կազմակերպվել են մի շարք կոնֆերանսներ, որոնցում ամերիկացի քաղաքական վերլուծաբանների ուշադրության կենտրոնում են գտնվել Թուրքիան ու նրա արտաքին քաղաքականությունը։
Ամերիկացի վերլուծաբանների կարծիքով՝ Թուրքիան շարունակելու է աջակցել Հարավային Կովկասում խաղաղությանն ու կայունությանը և ղարաբաղյան հակամարտության կարգավորման հարցում Ադրբեջանի դիրքորոշմանը։
Արտաքին կապերի խորհրդի ներկայացուցիչ Սթիվեն Կուկը ընդգծել է Թուրքիայի արտաքին քաղաքականության 3 վճռորոշ գործոն. որպես առևտրային երկիր՝ Թուրքիայի տնտեսական հավակնությունները, առավել բաց և ժողովրդավար հանրության վերածվելու գործընթացը, ինչպես նաև գլոբալ փոփոխությունները։
Նրա կարծիքով, Թուրքիան միջնորդական քաղաքականության միջոցով ամրապնդելու է իր դիրքերը Հարավային Կովկասում։ Կուկը նաև պատմել է արաբական երկրներում բարձրացած դժգոհության ալիքի նկատմամբ Թուրքիայի դիրքորոշման մասին։
Վերլուծաբան Դուրան Ուղուրը կարծում է, որ Թուրքիան փորձելու է ամրագրել Ադրբեջանի հետ իր քաղաքական ու տնտեսական հարաբերությունները, քանի որ Թուրքիան վստահում է այդ երկրին։
Ամերիկացի վերլուծաբանների կարծիքով, Թուրքիան հասկանում է, որ ղարաբաղյան հակամարտությունը շարունակում է նրա համար խնդիր մնալ, և նա կշարունակի իր ջանքերն այդ խնդրի խաղաղ կարգավորման ուղղությամբ։
Վերլուծաբան Քրիս Գրեմերսն ընդգծել է, որ Ադրբեջանի դերն ուժեղանում է որպես էներգետիկ ու առևտրային գործընկեր։ Նրա կարծիքով, հենց որ լուծվի ղարաբաղյան հակամարտությունը, Ադրբեջանն ու տարածաշրջանի մյուս երկրները զարգանալու առավել մեծ հնարավորություններ կստանան։
Նշվում է, որ տարածաշրջանում Թուրքիայի դերն իսկապես կարող է աճել։
Հիշեցնենք, որ Էրդողանի գլխավորած «Արդարություն և զարգացում» կուսակցության (ԱԶԿ) նախընտրական ծրագրի արտաքին քաղաքականության բաժնում նշված էր. «Ռուս-թուրքական հարաբերությունների զարգացումը նոր հնարավորություններ է ընձեռում Կովկասում, Միջին Ասիայում և այլ շրջաններում ռուս-թուրքական նոր համագործակցության համար:
Ղարաբաղյան հակամարտության կարգավորման հարցում ԱԶԿ-ն շարունակելու է աջակցել ադրբեջանական տարածքների «օկուպացման» վերացմանը և խնդրի բանակցային ճանապարհով կարգավորմանը»։