«Քաղաքական համակարգն այսօր ապրում է հետհեղափոխական կոլապս». «Առաջին լրատվական»- ի հետ զրույցում մանրամասնելով իր այս միտքը՝ «Այլընտարնաքային նախագծեր խումբ» հասարակական կառույց անդամ Վահե Հովհաննիսյանը նշեց. «Մենք լուրջ դժվարությունների փուլում ենք, ամենամեծ վտանգը քաղաքական դաշտի դեֆոլտն է: Քաղաքական դաշտը ինչ-որ տեղ այլասերված, ինչ-որ տեղ կեղծ մեխանիզմներով կար, մայիսից հետո ընդհանրապես քաղաքական դաշտը Հայաստանում գոյություն չունի, դա ողբերգություն է:
Քաղաքական դաշտը հին դեմքերով, դաշինքներով գոյություն չունի, նորը ստեղծելու համար ռեսուրսներ չունենք:
Այսօրվա դրությամբ՝ ընտրությունների արդյունքում միայն երկու անձ կարող են հայտնվել ԱԺ-ում՝ Ծառուկյանն ու Փաշինյանը: Իսկ ՀՀԿ-ն անցյալի էջ է: Ես չեմ հավատում, որ կլինի վերադարձ անցյալին կամ հակահեղափոխություն»:
Վահե Հովհաննիսյանն անդրադարձավ նաև վարչապետի ձևակերպումներից մեկին. «Նիկոլ Փաշինյանը մի ձևակերպում է անում «հեղափոխական թիմ», ինձ համար դա հասկանալի չէ, դա երկրի համար վտանգավոր է. «հեղափոխական թիմ» քաղաքական կատեգորիա չկա, դա իրավական հասկացություն էլ չէ, այլ էմոցիոնալ հասկացություն է»:
Հովհաննիսյանի գնահատմամբ՝ Փաշինյանն ունի շատ բարձր վարկանիշ, նա կարողացել է միայնակ անել այն, ինչ շատերն են ուզեցել, բայց չեն կարողացել: «Մոտ ենք Փաշինյանի միանձնյա կառավարմանը, որը մտահոգիչ է»,- նշեց Վ. Հովհաննիսյանը:
Նա նաև հավելեց, որ հին էլիտան ադեկվատ չէ Հայաստանի մարտահրավերներին, և Հայաստանում ձևավորվում է նոր էլիտա… «Այս երկիրն առաջ է տանելու միտքը»,- ընդգծեց մեր զրուցակիցը:
Վ. Հովհաննիսյանն անդրադարձավ նաև արտաքին վտանգներին՝ ընդգծելով, որ վտանգ է տեսնում ղարաբաղյան ճակատում․ «Ադրբեջանը պատրաստվում է պատերազմի… Արցախը պետք է լինի համահայկական պաշտպանության կենտրոն»:
Մանրամասն՝ տեսանյութում:
