«Արցախում տեղի ունեցողը կարևոր գործընթաց է, որն ունի և՛ ներքաղաքական, և՛ մի քանի պատճառներով նաև արտաքին քաղաքական նշանակություն, որը նաև Հայաստանին է վերաբերում: Ղարաբաղի ժողովուրդը նույնպես ձեռք է բերում սուվերենություն, իսկ դա նշանակում է, որ հանրությունը ձևավորում է իշխանություն և ինքն է որոշում իր ճակատագիրը: Այսինքն՝ հանրությունը դառնում է քաղաքական գործոն»,- այս մասին «Առաջին լրատվական»- ի հետ զրույցում ասաց «Համագործակցություն հանուն ժողովրդավարության» ՀԿ նախագահ, քաղաքագետ Ստեփան Դանիելյանը:
Նրա խոսքով՝ վերջին 20 տարիներին Արցախի ժողովուրդը դարձել է գործոն, և դա հիմնարար նշանակություն ունի նաև արտաքին քաղաքականության առումով՝ դրական իմաստով: «Հանրությունը մտել է քաղաքակնություն և իր կամքն է թելադրում, ձևավորվում են արժեքային համակարգեր: Արցախն արդեն ակնհայտորեն ավելի առաջավոր է, քան Ադրբեջանը, և Ադրբեջանի հասարակության մեջ ձևավորվում է ոչ լիարժեքության զգացում: Արտաքին քաղաքականության երկրորդ գործոնն այն է, որ Արցախում՝ այդ ռազմականացված տարածքում ավելի ժողովրդավարական իշխանություն է ձևավորվում, որտեղ հասարակությունը իր կամքն է թելադրում, և այդ ժողովրդին հետադիմական Ադրբեջանի կազմում տեսնելն արդեն վիրավորանք է ժողովրդավար հասարակությունների համար»:
Անդրադառնալով դիտարկմանը, որ նվազում են այն կասկածները, թե հակահեղափոխությունը կարող է գործի դնել իր գործիքները և ռևանշի շանս ստանալ, Ս. Դանիելյանը նշեց. «Մենք չպետք է վախենանք հակահեղափոխությունից, որովհետև Հանրապետական կուսակցություն այլևս չկա, և՛ ՀՀԿ-ն, և՛ Սերժ Սարգսյանը, և Ռոբերտ Քոչարյանը այլևս քաղքականապես մահացած են: Այդ կուսակցությունն այլևս չի կարող վերականգնվել… ՀՀԿ-ն իշխանական, տնտեսական, բյուրոկրատական մեքենան էր, իշխանությունը կորցնելուց հետո նա այլևս վերականգնելու ենթակա չէ:
Մտահոգությունս հետևյալն է՝ կա վտանգ, որ քաղաքական դաշտում մի նոր ՀՀՇ կստեղծվի՝ ի դեմս «Քաղաքացիական պայմանագրի», իշխանությունը վերցնելուց հետո արդեն հերթեր են գոյացել, և ստիպված ընդունելությունը ժամանակավորապես դադարեցվել է, այսինքն՝ պատեհապաշտների զանգվածը մտնում է հաջորդ իշխանական կուսակցություն, և վտանգ կա, որ քաղաքական դաշտը չի ձևավորվի: Վախենում եմ, որ երկրորդ ժողովրդավարական բևեռը չստեղծվի»:
Մանրամասն՝ տեսանյութում: