Պաշտոնական հաղորդագրությունում նշվում է, թե աշխատանքային օրվա առաջին կեսին Տիգրան Սարգսյանը հանդիպել է աշխարհի տարբեր երկրներից Լոնդոն ժամանած հայ գործարարներին, հետո հարցազրույց է տվել բրիտանական BBC ընկերությանը, իսկ երեկոյան ներկա է եղել Բուքինգհեմյան պալատում արքայազն Չարլզի և Արմեն Սարգսյանի նախաձեռնած դրամահավաքին… «Դրամահավաքից գոյացած միջոցներն ուղղվելու են Հայաստանում «Երևան՝ իմ սեր» և Շոտլանդիայի հարավ-արևմուտքում գտնվող Դամֆիս դղյակի պահպանման ծրագրերին»,- ասվում է պաշտոնական հաղորդագրությունում:
Աշխարհի տարբեր երկրների հայ գործարարների հետ Տ.Սարգսյանը կարող էր, իհարկե, հանդիպել նաև Հայաստանում, BBC-ին կարող էր հարցազրույց տալ՝ Երևանից դուրս չգալով, եթե BBC-ին դա, հարկավ, հետաքրքրեր… Երևանում ինչ-որ բաներ կառուցելու համար ևս դրամահավաքը կարելի էր Երևանում կազմակերպել: Բայց այ արքայազն Չարլզին Երևան բերել հաստատ չէր հաջողվի… Ակնհայտ է, որ Տ.Սարգսյանը արքայազն Չարլզին Լոնդոնում էլ չէր կարողանա հանդիպել, եթե Արմեն Սարգսյանը չկարողանար այնպես անել, որ դրամահավաքից գոյացած միջոցները Շոտլանդիայի ինչ-որ դղյակի պահպանման ծրագրերին ուղղվեին… Պետք է խոստովանել, որ բավականին լավ «դիվանագետ» է Արմեն Սարգսյանը:
Մի կողմից՝ Շոտլանդիայի դղյակի համար փող հավաքելով՝ կարողանում է հասնել նրան, որ արքայազն Չարլզը գա մի ընդունելության, որտեղ հավաքվածների ազգության մասին երևի պատկերացում էլ չունի… Մյուս կողմից՝ հարմարեցնում է Երևանում անվճար հողեր վերցնել՝ վրան բարեգործության անվան տակ ինչ-որ շենքեր ու կենտրոններ կառուցելու համար… Բայց պետք է նշել, որ նախորդ տարվա համեմատ, այս տարի ավելի քիչ «դիվանագետ» գտնվեց Ա.Սարգսյանը: Նախորդ տարի, երբ Ս.Սարգսյանը գնաց Լոնդոն, մասնակցեց նույն այդ դրամահավաքին ու հանդիպեց նույն այդ արքայզն Չարլզի հետ, Ա.Սարգսյանը, բացի այդ դղյակից ու Երևանում հողերից, նաև հարմարեցրեց Ղազախստանի նախագահ Նուրսուլթան Նազարբաևի՝ մեկ-մեկ երգող աղջկան՝ Դարիգային, երգացնել արքայզն Չարլզի ներկայությամբ: Իսկ ինչպես հայտնի է, Նուրսուլթան Նազարբաևի հետ Ա.Սարգսյանը սեփականություն ունի Ղազախստանում: Այդ համերգն էլ կազմակերպվել էր որպես «Երևան՝ իմ սեր» նախագծի մեկնարկն ազդարարող համերգ, որին ելույթ են ունեցել նաև Ջիվան Գասպարյանն ու մի քանի այլ հայեր:
Ի դեպ, նախորդ տարի Սերժ Սարգսյանի պատվիրակության կազմում էին Ն.Ս.Օ.Տ.Տ Գարեգին Երկրորդ Ամենայն Հայոց Կաթողիկոսը, արտաքին գործերի նախարար Էդվարդ Նալբանդյանը, Երևանի քաղաքապետ Գագիկ Բեգլարյանը… Լոնդոնում էին նաև «ՀայՌուսգազարդի» գործադիր տնօրեն Կարեն Կարապետյանը, Ս.Սարգսյանի աշխատակազմի ղեկավար Կարեն Կարապետյանի եղբայրը՝ Սամվել Կարապետյանը, և այլք: Իսկ այդ համերգի տոմսը, մեր տեղեկություններով, վաճառվել է 25 հազար ֆունտով… Կարելի է պատկերացնել, թե մեր պաշտոնյաները որքան են ծախսել այդ համերգին ներկա գտնվելու և ընդհանրապես այդ այցի ընթացքում: Թե կոնկրետ որքան են մերոնք այս տարի ծախսել լոնդոնյան այցի համար՝ դժվար է ասել:
Բայց ակնհայտ է՝ ինչպես Սերժ Սարգսյանի նախորդ տարվա այցը և Լոնդոնի Միջազգային հարաբերությունների թագավորական ինստիտուտում նրա ելույթը որևէ էական բան չտվեցին Հայաստանին դիվանագիտական առումով, այնպես էլ այս տարի Հայաստանը ոչինչ չշահեց Տիգրան Սարգսյանի այցից և առավել ևս՝ BBC-ին վերջինիս տված հարցազրույցից: Լոնդոնի Միջազգային հարաբերությունների թագավորական ինստիտուտում վերջերս ելույթ ունեցավ նաև Րաֆֆի Հովհաննիսյանը, այնտեղ 90-ականների սկզբից սկսած ելույթ են ունեցել Հայաստանի բազմաթիվ պաշտոնյաներ: Իսկ BBC-ին Տ.Սարգսյանի տված հարցազրույցը ոչ միայն որևէ նշանակություն չէր կարող ունենալ դիվանագիտական առումով, այլև բովանդակության տեսակետից էլ բացարձակապես ոչինչ չասող մի բան էր: Այնպես որ, այս ամենի արդյունքում թերևս շահում է միայն Ա.Սարգսյանը: Իսկ Սերժ և Տիգրան Սարգսյանները շահեցին միայն այնքանով, որ հնարավորություն ունեցան նկարվել արքայզն Չարլզի հետ… Եթե, իհարկե, սա կարելի է համարել «շահում»: