Ղրղզստանի նախագահ Ռոզա Օթունբաևան առաջարկել է ապագայում հրաժարվել դպրոցներում ռուսերենով ուսուցանումից և անցնել ազգային լեզվին: Այս մասին հաղորդում են ղրղզական լրատվամիջոցները: «Ղրղզստանում ժամանակի ընթացքում կրթությունը պետք է իրականացվի միայն պետական լեզվով»,- հայտարարել է Օթունբաևան Ղրղզստանի ժողովուրդների ասամբլեայի ժամանակ:
Նրա խոսքերով, բոլոր ազգերի երեխաները պետք է տիրապետեն պետական լեզվին, «այլ ոչ թե ատեստատում միայն գնահատական ստանան դրա համար»: «Այլ երկրներում, օրինակ՝ Ղազախստանում, որտեղ մոտ 40%-ն ազգային փոքրամասնությունների ներկայացուցիչներ են, ղազախերենով խոսող բնակչության թիվը գերակշռում է: Սա խոսում է երկրի ինքնիշխանության մասին: Այդպես պետք է լինի նաև Ղրղզստանում»,- ասել է նախագահը:
Նրա կարծիքով, այսօր լուրջ աշխատանքային վերելքի հույս ունեն այն մարդիկ, որոնք տիրապետում են պետական լեզվին: