Թերթը գրում է, որ «Հայաստանի էլեկտրական ցանցեր» ընկերությունում նորանոր չարաշահումներ են բացահայտվում. «Մենք մոտ մեկ ամիս առաջ գրեցինք, որ նոր տնօրեն Եվգենի Բիբինի ուսումնասիրություններից հետո բացահայտվել են մի շարք ֆինանսական չարաշահումներ, որոնք տեղի են ունեցել մի քանի հիմնարկների միջոցով: Դրանց թվում են «Էներգոչափ», «Էկտրեկ» ընկերությունները: Դեռևս այն ժամանակ խոսվում էր ճապոնական վարկի հետ կապված ֆինանսական չարաշահումների մասին, ինչի վերաբերյալ մեզ նոր մանրամասներ են հայտնի դարձել: Մեզ հասած տեղեկություններով՝ 2007-2010 թթ. իրականացվող ճապոնական վարկից 34 միլիոն դոլարը նախատեսված է եղել 32 ենթակայան վերանորոգելու համար, սակայն, ըստ բացահայտումների, վերանորոգվել է ընդամենը 14-ը։
Թերթի տեղեկություններով՝ տնօրենի տեղակալ Կարեն Դարբինյանին պատկանող «Էներգոչափ» ՓԲԸ-ին շուկայականից մի քանի անգամ ցածր գներով վաճառվել է Նորքում գտնվող 4 հարկանի շենքն իր ամբողջ տարածքով՝ պետությանը պատճառելով միլիոնավոր դոլարների վնաս: Այդ տեղեկությունների համաձայն՝ ՀԷՑ-ին պատկանող շինությունները նույնպես «կոպեկներով» սեփականաշնորհվել ու վաճառվել են «Էկտրեկ» ընկերությանը. «Նշենք, որ փոխտնօրեն Կարեն Դարբինյանը, ում անվան հետ են կապում վերոնշյալ չարաշահումները, այս ընթացքում արձակուրդում է գտնվում»,- հավելում է «Հրապարակ»-ը:
