Ֆրանսիայում լույս տեսնող «Յառաջ» թերթի փոխանցմամբ վերջերս Թուրքիայի վարչապետի այցը Տիգրանակերտ և այնտեղ «Քուրդիստան» անվանումը գործածելը հրապարակային խոստովանություն էր առ այն, որ բանակցություններ են ընթանում թուրքական կառավարության և «Քուրդիստանի աշխատավորական կուսակցության»՝ PKK-ի ղեկավար Աբդուլլահ Օջալանի միջև: Սա և նման բազմաթիվ այլ երևույթներ թույլ են տալիս ենթադրել, որ, Թուրքիայում սկսել են խորտակվել որոշ արգելքներ: Այս զարգացումները, բնականաբար, որոշ մտավախություններ են առաջացրել ազգայնամոլ շրջանակներում, որի անդամներից ոմանք արդեն «մութ» հեռանկարներ են գուշակում:
«Այս ամենի մասին թուրք փաստաբան, մարդու իրավունքների պաշտպան Օրհան Քեմալ Չենկիզը դեկտեմբերի 1-ին հոդված է հրապարակել արաբական «Ալ Մոնիթոր» անգլալեզու առցանց թերթում: Անդրադարձ կատարելով թուրք ազգայնամոլների այս և նման այլ մտավախություններին՝ հեղինակը նշել է, որ ոչ-մահմեդականների ճակատագիրը հազվադեպ է վարչապետ Էրդողանի ուշադրությանը արժանանում: Իրոք, Էրդողանն այլևս երբեք չի կրկնել 2009-ին արած և բոլորին ապշեցրած այն հայտարարությունը, թե՝ «նրանք, ովքեր ունեին ազգային այլ ինքնություն՝ արտաքսվեցին մեր երկրից: Դա կատարվեց ֆաշիստական մոտեցման հետևանքով»:
Հոդվածի հեղինակն ասում է, որ այդ խոսքերով Էրդողանն, անկասկած, ակնարկում էր 1915-ի ողբերգությունը, ու նաև նշում է, որ թուրք վարչապետը այդ օրվանից հետո ամեն անգամ երբ խոսում է Թուրքիայի մասին, այն ներկայացնում է որպէս «տարբեր ազգերի մի խճանկար»: Սակայն Էրդողանը միշտ նշում է արաբներին, քրդերին, թուրքերին, չերքեզներին, բայց ոչ երբեք Թուրքիայում վաղուց ապրող ոչ-մահմեդական ազգերին՝ հայերին, հույներին, հրեաներին, ասորիներին:
Ու Չենկիզն ասում է, որ Թուրքիայում շատ արգելքներ են մեղմացվել, այդ թվում Հայոց ցեղասպանության թեմային վերաբերող: Բայց անմիջապես հավելում է, որ ապրիլի 24-ին Հայոց ցեղասպանության զոհերի հիշատակի արարողության մասնակիցներին ազգայնամոլներից պաշտպանելը կամ Ցեղասպանության մասին բանավեճեր թույլատրելը չի նշանակում, որ թուրքական կառավարությունն այդ հարցի նկատմամբ փոխել է իր պաշտոնական դիրքորոշումը:
Նկատի ունենալով 2015-ին դիմագրավելու՝ Թուրքիայի կողմից նախաձեռնված ծավալուն ծրագրի մշակումը՝ Չենկիզն իր խոսքը եզրափակում է՝ նշելով, որ արդեն իսկ կարելի է ասել, թե Թուրքիայի ժխտողականությունը փոփոխության չի ենթարկվի 2015-ին»: