Բեյրութում լույս տեսնող ՍԴՀԿ «Արարատ» պաշտոնաթերթի խմբագիր Ահարոն Շխրտմյանը «Առաջին լրատվականի» հետ զրույցում, անդրադառնալով Կազանում նախատեսվող հանդիպմանը, նշեց.
«Ըստ երևույթին այդ հանդիպումը ճակատագրական պետք է լինի հակամարտության կարգավորման համար, եթե նկատի ունենանք ԵԱՀԿ Մինսկի խմբի համանախագահների հայտարարությունները, որտեղ նրանք հասկացնել են տալիս, որ ինչ-որ համաձայնագիր պետք է ընդունվի և նախագիծը պատրաստման փուլում է»։
Մյուս կողմից՝ Ահարոն Շխրտմյանի գնահատմամբ, բարդ է կանխատեսել, թե իրականում ինչ համաձայնություն ձեռք կբերվի կամ ինչպիսի վերջնական հանգրվանի կհասնի ղարաբաղյան խնդրի կարգավորումը Կազանի հանդիպումից հետո, «որովհետև խոսքը երկկողմանի փոխզիջումների մասին է»։
«Մենք չենք կասկածում, որ Հայաստանը պիտի ձգտի պաշտպանել Լեռնային Ղարաբաղի շահերը, ազգային ինքնորոշման, հողային ամբողջականության իրավունքներից ելնելով պիտի նստի բանակցություններիի սեղանի շուրջ, և սակարկություններ չպետք է կատարի տարածքային կամ կարգավիճակի հարցերում»,- ասում է «Արարատ»-ի խմբագիրը։
Նկատի ունենալով նաև Ադրբեջանի հստակ դիրքորոշումն ու հակառակ հայտարարությունները, Ահարոն Շխրտմյանը չբացառեց, որ կողմերը կշարունակեն մնալ նույն դիրքորոշումներով, կհրաժարվեն որևէ համաձայնության գալ, և բնականաբար, այս դեպքում Կազանի հանդիպումը կլինի ոչ թե հանգրվանային, այլ հերթական հանդիպում։
