Ինչպես գրում է Times-ը, Ճապոնիայի կառավարությունն անհանգստացած է երկրում ծայր առած ինքնասպանությունների ալիքից, որի պատճառը բնական և ատոմային աղետներն են, որոնք Ծագող արևի երկրում տեղի են ունեցել վերջին շրջանում: Նմանատիպ դրսևորումներից վախենում են նաև Ֆրանսիայի իշխանությունները: Ճիշտ է, այլ պատճառներով:
Ճապոնիայում առանց այն էլ բարձր է ինքնասպանությունների քանակը, սակայն վերջին տվյալները ցույց են տալիս, որ այս տարի նախորդի համեմատ այդ ցուցանիշն ավելացել է 20%-ով: Ամենատագնապալի տեղեկությունները գալիս են Միյագի պրեֆեկտուրայից, որն ամենաշատն էր տուժել մարտյան ցունամիից: Այստեղ ինքնասպանությունների թիվը 39%-ով ավել է:
Ուրբաթ օրը հրապարակված հոդվածի հեղինակները զգուշացնում են, որ դիմացկունությունը, որը դրսևորում են աղետից տուժածներն առաջին օրերին, կարող է լինել ընդամենը շոկի հետևանք, որի պատճառը հետվնասվածքային սթրեսային խանգարումներն են: Այս շաբաթ Սոմա քաղաքի ֆերմերներից մեկը, որը բնակվում է Ֆուկուսիմա պրեֆեկտուրայի ամենավտանգավոր գոտում, կախվել է այն բանի համար, որ արգելք է դրվել վարակված գոտուց կաթի արտահանման վրա:
«Բացի դժբախտությունից, աղետից մազապուրծ մնացածները մեղքի մեծ զգացում ունեն իրենց զոհված հարազատների և բարեկամների հանդեպ: Նաև շոկ են ապրում բժիշկներն ու մարդասիրական կազմակերպությունների ներկայացուցիչները, որոնք մասնակցում են մարդկանց ինքնությունը պարզելու պրոցեսին: Նրանց մոտ լինում են դեպրեսիայի երկարատև երևույթներ»,- ասված է հաշվետվության մեջ:
Ընդհանուր առմամբ երկրում ինքնասպանությունների թիվն աճել է 18%-ով: Միայն մայիսին Ճապոնիայում զոհվել է 3281 մարդ, որն ավել է նախորդ տարվա նույն ժամանակահատվածից 499 մարդով: Տոկիոյում ինքնասպանությունների քանակն աճել է 27%-ով:
Ինքնասպանությունների աճն ուղիղ կապ ունի երկրում տեղի ունեցած աղետալի իրադարձությունների հետ: 1990-ական թվականների վերջի տնտեսական ճգնաժամի ամենաթեժ պահին ինքնասպանությունների թիվը տարեկան աճել էր 25-30 հազարով:
Ֆրանսիացիներն էլ են սպասում ինքնասպանությունների թվի աճի: Սակայն այստեղ խնդիրը նրանում է, որ բոլորը սպասում են 2012 թ. «կանխատեսվող» աշխարհի վերջին:
Հոգեբաններն ասում են, որ այս «իրադարձությունն» էլ կարող է հանգեցնել ինքնասպանությունների մեծ ալիքի: Իրավիճակն ավելի է բարդանում, քանի որ ինտերնետ հրապարակումները նպաստում են անառողջ քննարկումների տարածմանը: Այս մասին հաղորդում է Vesti.ru կայքը:
