Կորեայի պրոֆեսիոնալ ֆուտբոլի լիգան, պայմանավորված խաղերին մասնակցելու համար, ցմահ որակազրկել է բարձրագույն դիվիզիոնում հանդես եկող տասը ֆուտբոլիստների: Այս մասին տեղեկացնում է Reuters-ը:
Բացի այդ նրանք կարող են քրեական պատասխանատվության ենթարկվել` ազատազրկվելով մինչև 7 տարի: Ֆուտբոլիստները որոշակի գումարի դիմաց դիտավորյալ պարտություններ են կրել երկու հանդիպումներում: Տասը խաղացողներից ութը հանդես են գալիս «Դեժեոն Սիթիզեն» ակումբում: Նրանցից մեկը ստացել է 110 հազար դոլար և կիսել այն յոթ խաղընկերների հետ:
«Մենք նման որոշում ենք կայացրել` հույս ունենալով, որ սա կլինի կորեական ֆուտբոլում առաջին և վերջին դեպքը»,- հայտարարել է հարավկորեական լիգայի կարգապահական կոմիտեի ղեկավար Կվակ Յուն Չոլը:
«Մենք ֆուտբոլիստներին առաջարկեցինք ներկա գտնվել կարգապահական կոմիտեի նիստին, որպեսզի նրանց հնարավորություն տրվի բացատրել իրենց արարքը, սակայն նրանցից ոչ ոք չներկայացավ»,- ասվում է հետաքննող խմբի ղեկավարի հայտարարությունում:
Հաղորդվում է, որ ևս մեկ խաղացողի որակազրկել են 5 տարով: Միևնույն ժամանակ պետությունում գործող միակ տոտալիզատորը` Sports Toto-ն ժամանակավորապես դադարեցրել է ֆուտբոլային հանդիպումների ելքերի կապակցությամբ խաղադրույքներ ընդունելը: