Մայր Աթոռի Տեղեկատվական համակարգի տնօրեն Վահրամ քահանա Մելիքյանը պատասխանել է «Մեդիամաքս» գործակալության հարցերին, որոնք առնչվում են Վեհափառի վրաստանյան այցին: Անդրադառնալով մամուլում տարածված լուրերին, թե երկու եկեղեցիների միջև համատեղ կոմյունիկե է ստորագրվել, Տեր Վահրամը, մասնավորապես, նշել է.
«Եվս մեկ անգամ պետք է շեշտեմ, որ այցի ընթացքում որևէ փաստաթուղթ, համատեղ կոմյունիկե չի ստորագրվել: Այդ առնչությամբ քննարկումներ եղել են, սակայն բանաձևումների շուրջ համաձայնություն չի կայացել: Վերը թվարկված խնդիրների շուրջ եղել են տարբեր մոտեցումներ և տեսակետներ, սակայն յուրաքանչյուր կողմի համար ընդունելի բանաձև չգտնելու պատճառով ընդհանուր հայտարարի կողմերը չեն եկել, ինչը նաև ժամանակի սղության հետևանք էր:
Սակայն պետք է արձանագրել, որ այն տեքստը, որը հրապարակվել էր իբրև Ամենայն Հայոց Կաթողիկոսի եւ Վրաց Պատրիարքի համատեղ կոմյունիկե, իրականում քննարկումների ժամանակ Վրաց Եկեղեցու առաջարկած կոմյունիկեի նախագիծն էր, որում կային Հայ Եկեղեցու համար անընդունելի դրույթներ և բանաձևումներ: Սակայն թե ինչպե՞ս է այն հայտնվել մամուլում, մեզ համար հստակ չէ: Փորձում ենք պարզել՝ թե ո՞ւմ շնորհիվ է և ինչո՞ւ է այդ տեքստը դրվել շրջանառության մեջ»:
Տեր Վահրամը, ի մասնավորի, հերքել է նաև այդ նախագծում առկա այն կետը՝ իբր ստեղծվելու է հանձնաժողով, որը կքննարկի վիճելի եկեղեցիների հարցը.
«Նման հանձնաժողովի ստեղծման շուրջ որևէ համաձայնություն չի եղել: Տեղեկացնեմ, որ ի պատասխան Հայ Առաքելական Եկեղեցու բարձրացրած՝ եկեղեցիների վերադարձման հարցին՝ վրացական կողմը ներկայացնում է իր պահանջները Հայաստանի հյուսիսում գտնվող մի շարք հայկական պատմական վանքերի ու եկեղեցիների վերաբերյալ: Այդ առնչությամբ հայկական կողմի կեցվածքը հստակ է. Վրաց Եկեղեցին պետք է ներկայացնի փաստեր և հիմնավորումներ, որոնք Հայ Եկեղեցին քննության կառնի: Սակայն որևէ հանձնաժողովի անհրաժեշտություն մենք չենք նկատում»:
Հիշեցնենք, որ երկուշաբթի օրը վրացական Грузия Online էլեկտրոնային պարբերականը տեղեկություն էր հրապարակել երկու եկեղեցիների միջև համատեղ կոմյունիկեի ստորագրման վերաբերյալ, ինչը շատ արագ տարածվել էր հայկական մամուլով և արժանացել զանազան ոչ միանշանակ գնահատականների:
Ավելի ուշ Վահրամ քահանա Մելիքյանը հերքել էր այդ տեղեկությունները իր ֆեյսբուքյան էջում, իսկ երեկ նույնը արել էր նաև Грузия Online-ը: Փաստորեն, սա Հայ Առաքելական եկեղեցու առաջին պաշտոնական հերքումն էր՝ չորս-հինգ օր ուշացումով: